មេដឹកនាំខណ្ឌ Boali នៃខេត្ត Ombella-M’poko របស់ សាធារណរដ្ឋអាហ្វ្រិកកណ្ដាល បានឱ្យដឹងថា សាកសពជនរងគ្រោះមួយចំនួនស្ថិតនៅក្នុងរថយន្ត ហើយចំនួនអ្នកស្លាប់អាចនឹងកើនឡើង ព្រោះមានអ្នករងរបួសធ្ងន់ធ្ងរច្រើន។
អាជ្ញាធរក្នុងតំបន់ខាងលើបានប្រាប់ថា មានករណីគ្រោះថ្នាក់ចរាចរណ៍ផ្លូវគោកមួយបានកើតឡើងនៅព្រឹកថ្ងៃទី ១១ កញ្ញា (ពេលវេលាក្នុងស្រុក) បានបណ្ដាលឱ្យមនុស្សចំនួន ១២ នាក់បាត់បង់ជីវិត និងជាង ៤០ នាក់រងរបួស។ ហេតុការណ៍នេះកើតឡើងនៅតំបន់ Kassango ក្នុងខណ្ឌ Boali នៃខេត្ត Ombella-M’poko របស់ សាធារណរដ្ឋអាហ្វ្រិកកណ្ដាល។
រថយន្តក្រុងដែលដឹកមនុស្ស ៦៧ នាក់ ចេញដំណើរពីទីក្រុង Beloko ដោយធ្វើដំណើរលើផ្លូវជាតិលេខ ១ បានជួបគ្រោះថ្នាក់នៅទីតាំងដែលមានចម្ងាយជិត ១០០ គីឡូម៉ែត្រ ពី រដ្ឋធានីបង់ហ្គី។
លោក Robert Yamo ដែលជាមេដឹកនាំខណ្ឌ Boali បានឱ្យដឹងថា រថយន្តដឹកលើសចំណុះ និងរត់លើសល្បឿនកំណត់គឺជាមូលហេតុដែលនាំឱ្យមានហេតុការណ៍គ្រោះថ្នាក់នេះ។ លោក Yamo បន្ថែមថា ដោយសារតែអ្នករងរបួសធ្ងន់ធ្ងរមានចំនួនច្រើន ដូច្នេះតួលេខអ្នកស្លាប់អាចនឹងកើនឡើងបន្តទៀត
កាលពីខែមិថុនា ២០២២ នៅត្រង់ចំណុចគ្រោះថ្នាក់ខាងលើក៏មានករណីគ្រោះថ្នាក់ចរាចរណ៍មួយបានកើតឡើង និងបានបណ្ដាលឱ្យមនុស្សយ៉ាងតិច ៩ នាក់ត្រូវស្លាប់ និងជាង ១០ នាក់រងរបួស៕