ក្រោយការប្រកាសរបស់ ឡេតូនី (Latvia) ដែលថា នឹងកម្ទេចបូជនីយដ្ឋានវិរជនសូវៀត បាតុកម្មមួយដែលគាំទ្រ រុស្ស៊ី ក៏ត្រូវបានធ្វើឡើងនៅ រដ្ឋធានីរីហ្កា ប៉ុន្តែ ត្រូវបានបំបែកទៅវិញ។
កាលពីថ្ងៃទី ២២ សីហា ប៉ូលិសរបស់ ប្រទេសឡេតូនី បានបំបែកហ្វូងបាតុករនៅ រដ្ឋធានីរីហ្កា ដែលធ្វើការប្រឆាំងតវ៉ាទៅនឹងការកម្ទេចបូជនីយដ្ឋានវីរជនសូវៀត។ មនុស្សយ៉ាងហោច ៦ នាក់ ត្រូវបានចាប់ខ្លួន នៅក្នុងហេតុការណ៍បាតុកម្មនេះ។
យោងតាមសារព័ត៌មានក្នុងស្រុក មនុស្សប្រហែល ៥០ នាក់ បានចូលរួមធ្វើបាតុកម្ម និងត្រូវសមត្ថកិច្ចបង្ក្រាប។ មុននោះ អាជ្ញាធររីហ្កា បានហាមគណបក្សសហព័ន្ធរុស្ស៊ីឡាតវី (Latvian Russian Union) ធ្វើពិធីជួបជុំនៅឧទ្យានជ័យជន្នះ បើទោះបក្សនេះមានលិខិតចុះបញ្ជីគណបក្សនៅ ឡេតូនី។
ក្នុងថ្ងៃដដែល ក្រសួងមហាផ្ទៃឡេតូនី Kristaps Eklon និយាយថា ក្រសួងនេះ រួមនឹងស្ថាប័នអនុវត្តច្បាប់របស់ ឡេតូនី បានត្រៀមរួចរាល់ហើយ សម្រាប់ការទប់ទល់នឹងបាតុកម្មដែលប្រឆាំងនឹងបទបញ្ជាកម្ទេចបូជនីយដ្ឋានវីរជនសូវៀត។ ចំណែកអភិបាលក្រុងរីហ្កា Martins Stakis ឱ្យដឹងថា បូជនីយដ្ឋាននេះនឹងត្រូវបានកម្ទេចចោល បន្ទាប់ពីបានរុះរើ។
បូជនីយដ្ឋានវិរជនសូវៀត ជាទីសម្រាប់គោរព និងរម្លឹកដល់គុណក្នុងការរំដោះ ឡេតូនី និង រីហ្កា នៃ សហភាពសូវៀត ពីកណ្ដាប់ដៃរបស់ កងទ័ពឈ្លានពានណាស៊ីអាល្លឺម៉ង់ ត្រូវបានបើកទ្វារកាលពីឆ្នាំ ១៩៨៥ នៅក្នុងឧទ្យានជ័យជម្នះរីហ្កា។
សូមរម្លឹកថា កាលពីរដូវក្ដៅឆ្នាំ ១៩៤៤ កងទ័ពក្រហមសូវៀត បានបើកការវាយប្រហារសំដៅលើអង្គភាពនៅភាគខាងជើងរបស់ កងទ័ពណាស៊ីអាល្លឺម៉ង់ នៅក្នុងបណ្ដាប្រទេសនៅតំបន់បាល់ទិច។ ថ្ងៃទី ១៣ ឧសភា ១៩៤៥ កងទ័ពដែលបរាជ័យរបស់ ហ្វាស៊ីសអាល្លឺម៉ង់ ក៏បានសុំចុះចាញ់នៅ Courland បញ្ចប់យុទ្ធនាការរំដោះបណ្ដាប្រទេសនៅតំបន់បាល់ទិច។ ទាហាន និងមន្ត្រីយោធាសូវៀត ប្រហែល ១០០,០០០ នាក់ បានពលីជីវិតនៅក្នុងយុទ្ធនាការយោធានោះ៕
