ប្រទេសអាល្លឺម៉ង់ បញ្ជូនក្រុមយន្តហោះចម្បាំង យន្តហោះដឹកជញ្ជូន និងយន្តហោះផ្គត់ផ្គង់ឥន្ធនៈមកធ្វើសមយុទ្ធយោធានៅ ទ្វីបអាស៊ី ជាលើកដំបូង ដែលនេះគឺជាការបង្ហាញអំពីសមត្ថភាពប្រយុទ្ធនៅក្នុងតំបន់។
«កងទ័ពអាកាសអាល្លឺម៉ង់ ជាលើកដំបូង បានបញ្ជូនយន្តហោះចម្បាំង និងយន្តហោះគាំទ្រ មកកាន់តំបន់ ឥណ្ឌូ-ប៉ាស៊ីហ្វ៊ិក។ ក្រុមយន្តហោះនេះបានឆ្លងកាត់ផ្លូវចម្ងាយ ១០,០០០ គីឡូម៉ែត្រ ក្នុងរយៈពេល ២៤ ម៉ោង» កងទ័ពអាកាសរបស់ ប្រទេសអាល្លឺម៉ង់ ប្រកាសកាលពីថ្ងៃទី ១៧ សីហា។
នេះក៏ជាការបញ្ចេញក្រុមយន្តហោះចម្បាំងទ្រង់ទ្រាយធំបំផុតរបស់ ទ័ពអាកាសអាល្លឺម៉ង់ នៅក្នុងសម័យសន្តិភាព។ សកម្មភាពនេះត្រូវបានគេយល់ថា គឺជាការបង្ហាញសមត្ថភាពប្រយុទ្ធ និងគាំទ្រដល់សម្ព័ន្ធមិត្តរបស់ អាល្លឺម៉ង់ នៅក្នុងតំបន់។
ក្រុមយន្តហោះយោធារបស់ អាល្លឺម៉ង់ ខាងលើ ដែលរួមមាន យន្តហោះចម្បាំង Eurofighter Typhoon ចំនួន ៦ គ្រឿង, យន្តហោះដឹកជញ្ជូន A400M ៤ គ្រឿង និងយន្តហោះផ្គត់ផ្គង់ប្រេងពហុមុខងារ A330 ចំនួន ៣ គ្រឿង បានមកដល់ សិង្ហបុរី កាលពីថ្ងៃទី ១៦ សីហា ត្រៀមខ្លួនដើម្បីទៅចូលរួមធ្វើសមយុទ្ធ Pitch Black នៅ អូស្ត្រាលី ចាប់ពីថ្ងៃទី ១៩ សីហា ដល់ ៩ កញ្ញា។
ក្នុងសមយុទ្ធខាងលើ ក្រុមហោះហើររបស់ អាល្លឺម៉ង់ ក៏មានគម្រោងធ្វើសមយុទ្ធរួមគ្នាជាមួយនឹង សិង្ហបុរី និងធ្វើទស្សនកិច្ចនៅ កូរ៉េខាងត្បូង និង ជប៉ុន ផងដែរ៕
