ប្រតិភូមួយក្រុមនៃ សភាអាម៉េរិក កាលពីម្សិលមិញបានចាប់ផ្ដើមដំណើរទស្សនកិច្ចរយៈពេល ២ ថ្ងៃ នៅ កោះតៃវ៉ាន់ និងមានគម្រោងជួបពិភាក្សាការងារជាមួយមេដឹកនាំកោះនេះ។
យោងតាមការិយាល័យតំណាងអាម៉េរិក នៅ កោះតៃវ៉ាន់ (AIT) ប្រតិភូអាម៉េរិក មួយក្រុមនេះរួមមានតំណាងរាស្ត្រ ៥ រូប ដែលដឹកនាំដោយតំណាងរាស្ត្រសភាជាន់ខ្ពស់ Ed Markey មកពីបក្សប្រជាធិបតេយ្យ។ ពួកគេនឹងពិភាក្សាអំពីបញ្ហាជាច្រើន មានដូចជា សន្តិសុខក្នុងតំបន់ ពាណិជ្ជកម្ម វិនិយោគ បណ្ដាញផ្គត់ផ្គង់ទូទាំងពិភពលោក និងបញ្ហាអាកាសធាតុជាដើម។ លោក Markey គឺជាប្រធានអនុគណៈកម្មការកិច្ចការបរទេសអាស៊ីខាងកើត អាស៊ីប៉ាស៊ីហ្វ៊ិក និងប្រធានអនុគណៈកម្មការសន្តិសុខអ៊ីនធើណិតអន្តរជាតិរបស់ សភាជាន់ខ្ពស់អាម៉េរិក។
AIT បានអធិប្បាយថា ដំណើរទស្សនកិច្ចនេះគឺជាផ្នែកមួយក្នុងបេសកកម្មមកកាន់តំបន់ឥណ្ឌូ-ប៉ាស៊ីហ្វ៊ិក របស់ ប្រតិភូតំណាងរាស្ត្រអាម៉េរិក។
ប្រកាសរបស់ AIT មានឃ្លាសរសេរថា «ពិសេសនៅក្នុងគ្រាដែល ចិន កំពុងបង្កើនភាពតានតឹងនៅ ច្រកសមុទ្រតៃវ៉ាន់ និងតំបន់ ដោយការធ្វើសមយុទ្ធយោធា ការដែលតំណាងរាស្ត្រ Markey ដឹកនាំប្រតិភូមកធ្វើ ទស្សនកិច្ចនៅ តៃវ៉ាន់ ជាថ្មីម្ដងទៀត បានបង្ហាញនូវការគាំទ្ររបស់ សហរដ្ឋអាម៉េរិក» ចំពោះកោះនេះ។
ការិយាល័យរបស់លោកស្រី ត្សៃ អ៊ីងវិន (ឆាយ អ៊ីងវិន) ឱ្យដឹងថា ប្រតិភូខាងលើនឹងជួបពិភាក្សាជាមួយមេដឹកនាំកោះនេះនៅថ្ងៃទី ១៥ សីហា។
ដំណើរទស្សនកិច្ចនេះកើតឡើងបន្ទាប់ពី ប្រធានសភាជាន់ទាបអាម៉េរិក លោកស្រី Nancy Pelosi បានធ្វើទស្សនកិច្ចនៅ កោះតៃវ៉ាន់ ចាប់ពីថ្ងៃទី ០២ ដល់ ០៣ សីហា ដែលបានបណ្ដាលឱ្យ ទីក្រុងប៉េកាំង ប្រតិកម្មយ៉ាងខ្លាំងក្លា ក្នុងនោះមានទាំងការធ្វើសមយុទ្ធយោធាទ្រង់ទ្រាយធំនៅជុំវិញ កោះតៃវ៉ាន់ ផងដែរ៕