រដ្ឋធានីសេអ៊ូល របស់ កូរ៉េខាងត្បូង ទើបតែបានឆ្លងកាត់គ្រោះជំនន់ទឹកភ្លៀងធំបំផុតក្នុងអំឡុង ៨០ ឆ្នាំមកនេះ ធ្វើឱ្យផ្លូវជាច្រើននៅក្នុងទីក្រុង ក្លាយទៅជាទន្លេ បណ្ដាលឱ្យខាតបង់ទ្រព្យសម្បត្តិ និងអាយុជីវិតមនុស្សជាច្រើននាក់។
ភ្លៀងធំដែលបានធ្លាក់នៅក្នុង និងជុំវិញតំបន់ សេអ៊ូល ចាប់ពីថ្ងៃទី ០៨ សីហា បានពន្លិចផ្លូវថ្នល់ជាច្រើនខ្សែ និងរថយន្តជាច្រើនគ្រឿង បង្កឱ្យកើតមានគ្រោះជំនន់ទឹកភ្លៀងដល់តំបន់ដែលមានភូមិសាស្ត្រទាប និងបង្ខំឱ្យប្រជាជនរាប់រយនាក់ត្រូវជម្លៀសខ្លួន។
យោងតាមអាជ្ញាធរកូរ៉េខាងត្បូង ចាប់ពីថ្ងៃទី ០៨ ដល់ ១០ សីហា បរិមាណទឹកភ្លៀងដែលបានធ្លាក់នៅ សេអ៊ូល គឺ ៥២៥ មម។ ចំណែកតំបន់ Yangpyeong ដែលមានចម្ងាយពី សេអ៊ូល ប្រហែល ៤៥ គីឡូម៉ែត្រទៅទិសខាងកើត បរិមាណទឹកភ្លៀងសរុបក្នុងពេលដំណាលគ្នានឹង ទីក្រុងសេអ៊ូល គឺ ៥២៦.២ មម។
ក្រុមមន្ត្រីរបស់ កូរ៉េខាងត្បូង កាលពីម្សិលមិញ បានបញ្ជាក់ថា មានមនុស្សចំនួន ៩ នាក់បានស្លាប់, ៧ នាក់បាត់ខ្លួន, ១៧ នាក់រងរបួស និងផ្ទះ អគារជាង ២,៦០០ ខ្នង ត្រូវលិចក្នុងទឹកជំនន់ ក្រោយពីភ្លៀងបានធ្លាក់ខ្លាំងនៅក្នុងសប្ដាហ៍នេះ។
នៅតំបន់ខាងលើ មានប្រជាជនប្រហែល ៥៧០ នាក់ មកពី ៣៩៨ គ្រួសារ ត្រូវជម្លៀសខ្លួន ទៅកាន់ទីសុវត្ថិភាព។ នៅទូទាំងប្រទេស អាជ្ញាធរបានជម្លៀសខ្លួនបណ្ដោះអាសន្នចំពោះមនុស្សប្រហែល ១,២០០ នាក់ មកពី ៧២៤ គ្រួសារ ដើម្បីគេចពីគ្រោះទឹកជំនន់ដ៏ធ្ងន់ធ្ងរនេះ៕
