ប្រធានាធិបតីរុស្ស៊ី បានព្យាករថា ការប្រែប្រួលធំនឹងធ្វើឱ្យមានសណ្ដាប់ធ្នាប់ពិភពលោកថ្មី ហើយមានតែប្រទេសដែល «មានអធិបតេយ្យភាពពិតប្រាកដ» ទើបដណ្ដើមបានជ័យជម្នះ»។
«ការប្រែប្រួលធំធេង ដែលមានលក្ខណៈជាបដិវត្តន៍ពិតប្រាកដ នឹងបង្កើតបានជាសណ្ដាប់ធ្នាប់ពិភពលោកថ្មីដ៏ស្រស់ល្អ យុត្តិធម៌ជាង សុវត្ថិភាព និងឆ្ពោះទៅកាន់សហគមន៍ជាងបច្ចុប្បន្ន» ប្រធានាធិបតីរុស្ស៊ី លោក វ្ល៉ាឌីមៀ ពូទីន ថ្លែងនៅក្នុងវេទិកាសេដ្ឋកិច្ចមួយនៅ មូស្គូ កាលពីថ្ងៃទី ២០ កក្កដា។
យោងតាមសម្ដីលោក ពូទីន នៅក្នុងយុគសម័យថ្មីដែលមានការប្រែប្រួលច្រើនបែបនេះ «មានតែបណ្ដាប្រទេសដែលមានអធិបតេយ្យភាពពិតប្រាកដទើបអាចជោគជ័យ»។ លោក ពូទីន បានឱ្យនិយមន័យនៃបណ្ដាប្រទេសដែលមានអធិបតេយ្យភាពពិតប្រាកដថាជា បណ្ដាប្រទេស «ដែលមានសេរីភាពក្នុងការអភិវឌ្ឍជាតិ និងបុគ្គលនីមួយៗ ក៏ដូចជាសមត្ថភាពជោគជ័យក្នុងវិស័យបច្ចេកវិទ្យា វប្បធម៌ ការយល់ដឹង និងអប់រំ» ទន្ទឹមនឹងនេះ ក៏ជាសង្គមស៊ីវិលមួយដែលសំដៅទៅកាន់ប្រទេសជាតិ មានការទទួលខុសត្រូវ និងវិជ្ជមាន។
លោក ពូទីន យល់ថា ប្រទេសបែបនេះនឹងជាគំរូសម្រាប់បណ្ដាប្រទេសដទៃ ស្ដីពី «ស្ដង់ដារ និងគុណភាពជីវិតរបស់ប្រជាជន ការការពារតម្លៃប្រពៃណី និងឧត្តមគតិរបស់មនុស្សជាតិ»។
«ពិភពលោកបែបនេះផ្ទុយពីសណ្ដាប់ធ្នាប់ពិភពលោកដែលគ្រប់គ្រងផ្ដាច់មុខដោយលោកខាងលិច ដែលកំពុងបង្អាក់ដំណើរនៃការអភិវឌ្ឍរបស់អរិយធម៌យើង» លោក ពូទីន ថ្លែងបញ្ជាក់ និងបានចោទបណ្ដាប្រទេសលោកខាងលិចថា «រើសអើងពូជសាសន៍ និងមានគំនិតអាណានិគមបែបថ្មី និងកាន់តែដូច លទ្ធិផ្ដាច់ការ»។
ប្រធានាធិបតីរុស្ស៊ី យល់ថា បើទោះជាក្រុមអ្នកមានអំណាចនៅបស្ចិមលោក ប្រឹងប្រែងយ៉ាងខ្លាំងក្លាដើម្បីរក្សាសណ្ដាប់ធ្នាប់ពិភពលោកបច្ចុប្បន្ន ប៉ុន្តែការប្រែប្រួលខាងលើនេះគឺជា «រឿងដែលមិនអាចក្រែប្រែបាន»។
សហរដ្ឋអាម៉េរិក និងសម្ព័ន្ធមិត្តលោកខាងលិច មិនទាន់មានការបញ្ចេញប្រតិកម្មអ្វីទៅនឹងការប្រកាសរបស់ ប្រធានាធិបតីរុស្ស៊ី នៅឡើយ៕
