ប្រធានាធិបតីសហរដ្ឋអាម៉េរិក លោក ចូ បៃដិន បានចេញបញ្ជាឱ្យបង្ហូតទង់ជាតិពាក់កណ្ដាលដងនៅ សេតវិមាន បណ្ដាអគាររដ្ឋ តំបន់សាធារណៈ និងមូលដ្ឋានកងទ័ព រហូតដល់ដំណាច់ថ្ងៃទី ១០ កក្កដា ដើម្បីរំលឹក និងគោរពវិញ្ញាណក្ខន្ធអតីតនាយករដ្ឋមន្ត្រីជប៉ុន លោក Shinzo Abe ដែលទើបតែបានទទួលមរណភាពក្នុងករណីឃាតកម្មកាលពីម្សិលមិញ (៨ កក្កដា)។
នៅក្នុងប្រកាសកាលពីម្សិលមិញ លោក បៃដិន សង្កត់ធ្ងន់ថា លោក Abe គឺជាមិត្តស្មោះស្ម័គ្ររបស់ សហរដ្ឋអាម៉េរិក និងធ្លាប់ធ្វើការជាមួយប្រធានាធិបតីទាំងឡាយរបស់បក្សទាំងពីរ ដើម្បីពង្រឹងសម្ព័ន្ធភាពរវាងប្រទេសទាំងពីរ ក៏ដូចជាជំរុញចក្ខុវិស័យស្ដីពីតំបន់ ឥណ្ឌូ-ប៉ាស៊ីហ្វិក ដែលប្រកបដោយសេរីភាព និងបើកទូលាយ។
ប្រធានាធិបតី បៃដិន ក៏បានផ្ញើការចូលរួមរំលែកទុក្ខដល់គ្រួសារលោក Abe។ លោក បៃដិន យល់ថា ការវាយប្រហារបែបនេះមិនត្រូវបានទទួលយកជាដាច់ខាត ហើយអំពើហិង្សាទាក់ទងនឹងគ្រឿងផ្ទុះតែងតែបន្សល់ទុកស្លាកស្នាមយ៉ាងជ្រៅនៅក្នុងសហគមន៍ដែលរងផលប៉ះពាល់។
លោក បៃដិន ក៏បានឱ្យដឹងថា នឹងធ្វើដំណើរទៅកាន់ ស្ថានទូតជប៉ុន នៅ វ៉ាស៊ីងតោន ដើម្បីចុះហត្ថលេខាលើបញ្ជីចូលរួមរំលែកទុក្ខ បន្ទាប់ពី អតីតនាយករដ្ឋមន្ត្រីជប៉ុន លោក Abe បានទទួលមរណភាពដោយសារអំពើឃាតកម្ម។ ប្រធានាធិបតីសហរដ្ឋអាម៉េរិក បញ្ជាក់ថា «ជប៉ុន គឺជាសម្ព័ន្ធមិត្តដ៏រឹងមាំ» របស់ សហរដ្ឋអាម៉េរិក៕
