កាលពីម្សិលមិញ (៣ កក្កដា) យន្តហោះ ២ គ្រឿង ដែលដឹកបុគ្គលិកការទូតរបស់ រុស្ស៊ី និងសាច់ញាតិរបស់ពួកគេចំនួន ៧០ នាក់ បានហោះចេញពី ប្រទេសប៊ុលហ្ការី ដោយសារការបណ្ដេញរបស់ រដ្ឋាភិបាលប៊ុលហ្គារី បើទោះជាប្រទេសទាំងពីរមានទំនាក់ទំនងជិតស្និទ្ធនឹងគ្នាជាច្រើនឆ្នាំមកហើយក៏ដោយ។
ក្នុងគ្រាដែលស្ថានការណ៍តានតឹងរវាង រុស្ស៊ី និងបណ្ដាប្រទេសនៅ អឺរ៉ុប កំពុងកើនឡើងខ្ពស់ សារព័ត៌មានរបស់ ប៊ុលហ្កាសរី បានឱ្យដឹងថា អ្នកការទូតរុស្ស៊ី និងសាច់ញាតិរបស់ពួកគេចំនួន ៧០ នាក់ បានបង្ហាញវត្តមាននៅឯអាកាសយានដ្ឋាននៅ រដ្ឋធានីសូហ្វ៊ីយ៉ា ដើម្បីត្រលប់ទៅ ប្រទេសរុស្ស៊ី វិញ ដោយជិះយន្តហោះ ២ គ្រឿងរបស់ រុស្ស៊ី បន្ទាប់ពី ប៊ុលហ្ការី សម្រេចចិត្តបណ្ដេញអ្នកការទូតទាំងនេះ។
ការសម្រេចចិត្តរបស់ ប៊ុលហ្ការី ខាងលើនេះ ត្រូវបានប្រកាសដោយ នាយករដ្ឋមន្ត្រីស្ដីទី Kiril Petkov ដែលជាអ្នកមាននិន្នាការប្រឆាំង រុស្ស៊ី។ នាយករដ្ឋមន្ត្រី Petkov ដែលទើបទទួលបរាជ័យក្នុងការបោះឆ្នោតផ្ដល់សេចក្ដីទុកចិត្តកាលពីចុងខែមិថុនា បានប្រកាសថា ទីក្រុងមូស្គូ ប្រើប្រាស់យុទ្ធសាស្ត្រ «សង្គ្រាមកូនកាត់» ដើម្បីផ្ដួលរំលំរដ្ឋាភិបាលរបស់លោក។
មុននោះ កាលពីថ្ងៃទី ១ កក្កដា ឯកអគ្គរដ្ឋទូតរុស្ស៊ី បានចេញឱសានវាទសម្រាប់ ប៊ុលហ្ការី ដើម្បីលុបចោលបទបញ្ជាបណ្ដេញអ្នកការទូតរបស់ រុស្ស៊ី និងបានគំរាមថា ទីក្រុងមូស្គូ នឹងកាត់ផ្ដាច់រាល់ទំនាក់ទំនងការទូតជាមួយប្រទេសនេះ។
កន្លងមក ប៊ុលហ្ការី បានគាំទ្រយ៉ាងពេញទំហឹងចំពោះវិធានការដាក់ទណ្ឌកម្មរបស់ លោកខាងលិច ទៅលើ ទីក្រុងមូស្គូ ចាប់តាំងពី រុស្ស៊ី បានបើកការឈ្លានពានលើទឹកដីរបស់ អ៊ុយក្រែន កាលពីជាង ៤ ខែមុន។ កាលពីចុងខែមេសា រុស្ស៊ី ក៏បានផ្ដាច់ប្រភពផ្គត់ផ្គង់ឧស្ម័នដល់ ប៊ុលហ្ការី ផងដែរ បន្ទាប់ពី ទីក្រុងសូហ្វ៊ីយ៉ា បដិសេធសំណើរបស់ ទីក្រុងមូស្គូ ស្ដីពីការទូទាត់វិក្កយបត្រដោយប្រើប្រាស់រូបិយប័ណ្ណ រូប្លរុស្ស៊ី៕