ប្រធានាធិបតី ហ្សេឡែនស្គី បានឱ្យដឹងថា អ៊ុយក្រែន បានដណ្ដើមមកវិញនូវទីក្រុង និងទីរួមស្រុកជាង ១,០០០ ខណៈដែល កងកម្លាំងរុស្ស៊ី កំពុងកាន់កាប់ទីក្រុង និងទីរួមស្រុកជាង ២,៦០០។
«ទឹកដីចំនួន ១០ តំបន់ ត្រូវរងឥទ្ធិពលដោយសារសង្គ្រាម រាប់ចាប់តាំងពីថ្ងៃទី ២៤ កុម្ភៈ។ កងទ័ពអ៊ុយក្រែន បានរំដោះទីក្រុង និងទីរួមស្រុកចំនួន ១,០២៧ ប៉ុន្តែ រុស្ស៊ី កំពុងគ្រប់គ្រង ២,៦១០ តំបន់» ប្រធានាធិបតីអ៊ុយក្រន លោក ហ្សេឡែនស្គី បានឱ្យដឹងកាលពីថ្ងៃទី ២ កក្កដាដូច្នេះ និងបានបន្ថែមថា តំបន់ដែលរងឥទ្ធិពលភាគច្រើនត្រូវការការស្ថាបនាឡើងវិញ និងរាបរយទីតាំង «ត្រូវបានកងទ័ពរបស់ រុស្ស៊ី បំផ្លាញទាំងស្រុង»។
ទាក់ទិននឹងការលើកឡើងរបស់ ប្រធានាធិបតីអ៊ុយក្រែន ខាងលើនេះ ភាគីខាងរុស្ស៊ី មិនទាន់មានប្រតិកម្មអ្វីនៅឡើយ។
សង្គ្រាមបានផ្ទុះឡើងនៅ អ៊ុយក្រែន ចាប់ពីថ្ងៃទី ២៤ កុម្ភៈ នៅពេល រុស្ស៊ី បើកការឈ្លានពានលើទឹកដីអ្នកជិតខាងមួយនេះ។ ជំហានបន្ទាប់នៃយុទ្ធនាការយោធាពិសេសរបស់ ទីក្រុងមូស្គូ កងទ័ពរុស្ស៊ី និងក្រុមផ្ដាច់ខ្លួន បាន និងកំពុងវាយសម្រុកនៅភាគខាងកើត និងស្វែងរកវិធីពង្រឹងកម្លាំងនៅភាគខាងត្បូងនៃ ប្រទេសអ៊ុយក្រែន៕