កាលពីថ្ងៃទី ២៩ មិថុនា នាយករដ្ឋមន្ត្រីជប៉ុន លោក Kishida Fumio បានសម្ដែងនូវគោលបំណងលើកកម្ពស់ទំនាក់ទំនងជាដៃគូជាមួយ អង្គការសន្ធិសញ្ញាអាត្លង់ទិកខាងជើង (ណាតូ/NATO) ក្នុងគ្រាដែលសន្តិសុខរបស់ អឺរ៉ុប មិនអាចកាត់ផ្ដាច់បានពីសន្តិសុខរបស់ អាស៊ី។
ថ្លែងនៅក្នុង ប្រទេសអេស្ប៉ាញ ក្នុងនាមជាមេដឹកនាំទីមួយរបស់ ជប៉ុន ដែលបានចូលរួមកិច្ចប្រជុំកំពូលរបស់ ណាតូ នាយករដ្ឋមន្ត្រី Kishida បានឱ្យដឹងថា ជប៉ុន ចង់លើកកម្ពស់ទំនាក់ទំនងជាដៃគូជាមួយ ណាតូ ដើម្បីបង្កើនកិច្ចសហប្រតិបត្តិក្នុងវិស័យជាច្រើនដូចជា សន្តិសុខអ៊ីនធើណិត និងសមុទ្រជាដើម។
លោក Kishida បានសង្កត់ធ្ងន់ថា ការព្យាយាមជាឯកតោភាគីដើម្បីផ្លាស់ប្ដូរស្ថានការណ៍នៅ សមុទ្រចិនខាងត្បូង និង សមុទ្រចិនខាងកើត គឺនៅតែកើតមាន ខណៈបញ្ហាសន្តិសុខប្រឈមនឹងហានិភ័យកាន់តែខ្ពស់នៅ អាស៊ីខាងកើត។ នាយករដ្ឋមន្ត្រីជប៉ុន ក៏បានវាយតម្លៃខ្ពស់ទៅលើការសាមគ្គីគ្នាដើម្បីបញ្ចប់ស្ថានភាពនេះ។
ក្នុងសន្និសីទកំពូលរបស់ ណាតូ ខាងលើ នាយករដ្ឋមន្ត្រីជប៉ុន និងអគ្គលេខាធិការរបស់ ណាតូ លោក Jens Stoltenberg ក៏បានឯកភាពគ្នាពិនិត្យឡើងវិញនូវកម្មវិធីសហប្រតិបត្តិការ និងភាពជាដៃគូរវាងសម្ព័ន្ធមិត្តយោធានេះ ជាមួយនឹង ជប៉ុន។ ភាគីទាំងពីរក៏បានយល់ស្រាបគ្នាថា បញ្ហាសន្តិសុខរបស់ អឺរ៉ុប និងសន្តិសុខរបស់ តំបន់ឥណ្ឌូ-ប៉ាស៊ីហ្វិក គឺជាបញ្ហាមិនអាចកាត់ផ្ដាច់ពីគ្នាបាន។ ណាតូ និង ជប៉ុន បានយល់ព្រមបង្កើនកិច្ចសហប្រតិបត្តិការបន្ថែមទៀតផងដែរ។
កិច្ចប្រជុំកំពូលរបស់ ណាតូ ឆ្នាំនេះ ត្រូវបានធ្វើឡើងនៅក្នុង រាជធានីម៉ាឌ្រីដ ប្រទេសអេស្ប៉ាញ។ ក្រៅពីសមាជិកក្នុងសម្ព័ន្ធមិត្ត កិច្ចប្រជុំនេះក៏មានការចូលរួមរបស់ មេដឹកនាំជប៉ុន កូរ៉េខាងត្បូង អូស្ត្រាលី និង នូវែលសេឡង់ ផងដែរ។
យោងតាមប្រភពព័ត៌មានពី រដ្ឋាភិបាលអាម៉េរិក កិច្ចប្រជុំខាងលើនឹងឯកភាពគ្នាអំពីការបង្កើតយន្តការពង្រីកកិច្ចសហប្រតិបត្តិការ ក្នុងបំណងធានានូវការប្រឹក្សាយោបល់ផ្នែកនយោបាយឱ្យបានម៉ត់ចត់ជាងមុន សហការគ្នាក្នុងការដោះស្រាយបញ្ហាដែលភាគីទាំងឡាយយកចិត្តទុកដាក់ រួមទាំងការគំរាមកំហែងផ្នែកសន្តិសុខអ៊ីនធើណិត សន្តិសុខលើផ្ទៃសមុទ្រ ការប្រឆាំងភេរវកម្ម ក៏ដូចជាផលប៉ះពាល់ពីបញ្ហាបម្រែបម្រួលអាកាសធាតុចំពោះ សន្តិសុខផងដែរ៕