រដ្ឋាភិបាលអង់គ្លេស ប្រកាសថា នឹងផ្ដល់ជំនួយជាអាវុធដែលមានតម្លៃ ១.២ ពាន់លានដុល្លារអាម៉េរិក បន្ថែមទៀត ដល់ អ៊ុយក្រែន ក្នុងនោះមានទាំងប្រព័ន្ធការពារដែនអាកាស និងអាវុធសម្រាប់សង្គ្រាមអេឡិកត្រូនិកផងដែរ។
«កញ្ចប់ជំនួយថ្មីនេះរួមមាន ប្រព័ន្ធការពារដែនអាកាសទំនើប យន្តហោះគ្មានមនុស្សបើក ឧបករណ៍សម្រាប់សង្គ្រាមអេឡិកត្រូនិក និងសព្វាវុធរាប់ពាន់គ្រឿងផ្សេងទៀតដែលមានសារសំខាន់បំផុតសម្រាប់ ទាហានអ៊ុយក្រែន។ នេះគឺជាជំហានដំបូងជួយឱ្យ អ៊ុយក្រែន ពង្រឹងសមត្ថភាពលើការការពារ និងឆ្ពោះទៅរកការវាយសម្រុកដើម្បីដណ្ដើមទឹកដីមកវិញ» រដ្ឋាភិបាលអង់គ្លេស ប្រកាសកាលពីថ្ងៃទី ២៩ មិថុនាដូច្នេះ។
កញ្ចប់ជំនួយជាអាវុធថ្មីនេះ បាននាំឱ្យជំនួយសរុបរបស់ អង់គ្លេស សម្រាប់ កងទ័ពអ៊ុយក្រែន ឡើងដល់ ២.៨ ពាន់លានដុល្លារអាម៉េរិក រាប់ចាប់តាំងពី រុស្ស៊ី បើកយុទ្ធនាការយោធាពិសេសកាលពីចុងខែកុម្ភៈ។
អង់គ្លេស ពិសេសគឺ នាយករដ្ឋមន្ត្រី ចនសុន គឺជាអ្នកគាំទ្រ អ៊ុយក្រែន យ៉ាងខ្លាំងក្លា ចាប់ពីពេល រុស្ស៊ី បើកការឈ្លានពាន។ លោក ចនសុន គឺជាមេដឹកនាំប្រទេសលោកខាងលិចដំបូងគេដែលបានថ្លែងការណ៍នៅក្នុង សភាអ៊ុយក្រែន បន្ទាប់ពីសង្គ្រាមបានផ្ទុះឡើង។ អង់គ្លេស ក៏ជាប្រទេសមួយក្នុងចំណោមប្រទេសដំបូងៗដែលបានផ្ដល់ជំនួយជាអាវុធធុនធ្ងន់ដល់ អ៊ុយក្រែន ក៏ដូចជាបានចូលរួមបង្វឹកទាហានប្រទេសនេះអស់ជាច្រើនឆ្នាំកន្លងមកផងដែរ។
ប្រធានាធិបតីអ៊ុយក្រែន លោក ហ្សេឡែនស្គី កាលពីម្សិលមិញ បានថ្លែងនៅក្នុងកិច្ចប្រជុំកំពូលរបស់ ណាតូ តាមរយៈប្រព័ន្ធវីដេអូ ថា ប្រទេសរបស់លោកត្រូវការអាវុធទំនើប និងជំនួយហិរញ្ញវត្ថុបន្ថែមទៀត ដើម្បីទប់ទល់នឹង កងទ័ពរុស្ស៊ី៕