អ៊ុយក្រែន នឹងមិនពិចារណាឡើងវិញអំពីគោលបំណងចូលជាសមាជិករបស់ ណាតូ នេះបើតាមរដ្ឋមន្ត្រីការបរទេស Dmitry Kuleba ថ្លែងនៅក្នុងកិច្ចសម្ភាសនាថ្ងៃទី ២៩ មិថុនា។
លោករដ្ឋមន្ត្រីការបរទេសរបស់ អ៊ុយក្រែន បានច្រានចោលនូវការអះអាងដែលថា អ៊ុយក្រែន បានបោះបង់ផែនការចូលជាសមាជិករបស់ សម្ព័ន្ធមិត្តយោធាណាតូ។
«ហេតុអ្វីបែរជាយ៉ាងនេះទៅវិញ? បញ្ហាចូលជាសមាជិកណាតូ ត្រូវបានសរសេរនៅក្នុងច្បាប់រដ្ឋធម្មនុញ្ញរបស់យើងរួចហើយ។ ក្រៅពីនេះ រចនាសម្ព័ន្ធរបស់សម្ព័ន្ធមិត្តនេះ បច្ចុប្បន្នគឺជាយន្តការការពារសន្តិសុខដែលមានប្រសិទ្ធភាពបំផុតនៅ អឺរ៉ុប» លោក Kuleba អះអាងដូច្នេះ។
លោកបន្ថែមថា «ក៏ប៉ុន្តែ ដោយសំអាងលើបំណងចូលជាសមាជិកណាតូ តែមួយមុខ របស់ យើង គឺមិនទាន់គ្រប់គ្រាន់ឡើយ។ សម្ព័ន្ធមិត្តនេះក៏ត្រូវការការប្រាថ្នាដូច្នេះ។ សហភាពអឺរ៉ុប បានធ្វើការសម្រេចចិត្តមួយជាប្រវត្តិសាស្ត្រ។ ប៉ុន្តែ យើងឃើញថា ចាប់តាំងពីសង្គ្រាមបានចាប់ផ្ដើម ណាតូ មិនទាន់បានបញ្ចេញសកម្មភាពណាមួយដែលជំរុញឱ្យយើងចូលរួម»។
អ៊ុយក្រែន បានបញ្ចូលក្ដីប្រាថ្នារបស់ពួកគេក្នុងការចូលជាសមាជិក ណាតូ ទៅក្នុងច្បាប់រដ្ឋធម្មនុញ្ញ និងនៅតែប្រឹងប្រែងដើម្បីសម្រេចបានគោលដៅនៃផែនការក្លាយជាសមាជិករបស់សម្ព័ន្ធមិត្តយោធានេះ ប៉ុន្តែ មកដល់បច្ចុប្បន្ន ប្រទេសនេះនៅមិនទាន់ទទួលបានជោគជ័យ និងបានពើបប្រទះនឹងការប្រឆាំងយ៉ាងខ្លាំងក្លាពីសំណាក់ ទីក្រុងមូស្គូ។
ចំណែកភាគីខាងរុស្ស៊ី វិញ ឯកអគ្គរដ្ឋទូតរងរបស់ រុស្ស៊ី ប្រចាំនៅ អង្គការសហប្រជាជាតិ លោក Dmitry Polyansky បានបញ្ជាក់ថា យុទ្ធនាការយោធាពិសេសរបស់ រុស្ស៊ី នៅ អ៊ុយក្រែន នឹងនៅតែបន្តរហូតដល់ពេល អ៊ុយក្រែន បញ្ឈប់ការវាយប្រហារទៅលើ Donbass និងលែងមានការគំរាមកំហែងណាមួយពីទឹកដីនេះ៕
