យ៉ាងហោចណាស់មានមនុស្ស ៣ នាក់ បានស្លាប់ និង ៥០ នាក់រងរបួស បន្ទាប់ពីរថភ្លើងដឹកអ្នកដំណើរមួយខ្សែបានជួបគ្រោះថ្នាក់ និងធ្លាក់ចេញពីផ្លូវដែកនៅក្នុងរដ្ឋ Missouri សហរដ្ឋអាម៉េរិក កាលពីម្សិលមិញ។
រថភ្លើង Amtrak កំពុងធ្វើដំណើរពីទីក្រុង Los Angeles ទៅកាន់ Chicago ក៏ស្រាប់តែបុកចាំរថយន្តដឹកកាកសំណល់មួយគ្រឿង ហើយក៏បានធ្លាក់ចេញពីផ្លូវដែកនៅក្នុងរដ្ឋ Missouri កាលពីថ្ងៃទី ២៧ មិថុនា។ យ៉ាងហោចណាស់មានមនុស្ស ៣ នាក់ បានស្លាប់ និង ៥០ នាក់រងរបួស នៅក្នុងចំណោមអ្នកដំណើរចំនួន ២៤៣ នាក់ និងក្រុមបុគ្គលិក ១២ នាក់។
បច្ចុប្បន្ន គណៈកម្មការជាតិសុវត្ថិភាពចរាចរណ៍របស់ សហរដ្ឋអាម៉េរិក កំពុងបន្តប្រមូលទិន្នន័យទាក់ទិននឹងហេតុការណ៍គ្រោះថ្នាក់នេះ។
គ្រោះថ្នាក់រថភ្លើងខាងលើបានកើតឡើងមួយថ្ងៃបន្ទាប់ពីរថភ្លើងដឹកអ្នកដំណើរមួយខ្សែផ្សេងទៀតរបស់ Amtrak បានបុកចំរថយន្តមួយគ្រឿងនៅក្នុងរដ្ឋ California សហរដ្ឋអាម៉េរិក បណ្ដាលឱ្យមនុស្ស ៣ នាក់ បាត់បង់ជីវិត។
