អនុប្រធានក្រុមប្រឹក្សាសន្តិសុខរុស្ស៊ី Medvedev ព្រមានដល់បណ្ដាប្រទេសជាសមាជិករបស់ ណាតូ (NATO) ថា នឹងជាការប្រកាសសង្គ្រាមជាមួយ រុស្ស៊ី បើសិនវាយប្រហារលើ គ្រីមៀ (Crimea) នាំឱ្យកើតសង្គ្រាមលោកលើកទីបី។
«ចំពោះយើង គ្រីមៀ គឺជាផ្នែកមួយរបស់ រុស្ស៊ី និងជារៀងរហូត។ រាល់ការប្រឹងប្រែងដើម្បីរំលោភលើ គ្រីមៀ សុទ្ធតែជាការប្រកាសសង្គ្រាមជាមួយប្រទេសរបស់យើង» អនុប្រធានក្រុមប្រឹក្សាសន្តិសុខរុស្ស៊ី Dmitry Medvedev អះអាងដូច្នេះកាលពីថ្ងៃទី ២៧ មិថុនា។
លោក Medvedev សង្កត់ធ្ងន់ថា «បើសិនការវាយប្រហារត្រូវបានធ្វើឡើងដោយសមាជិកណាមួយរបស់ ណាតូ នោះមានន័យថា សង្គ្រាមកើតឡើងជាមួយនឹង អង្គការសន្ធិសញ្ញាអាត្លង់ទិកខាងជើង (NATO / North Atlantic Treaty Organization) ទាំងមូល ហើយនោះគឺជាសង្គ្រាមលោកលើកទីបី។ វាគឺជាគ្រោះមហន្តរាយមួយយ៉ាងពិតប្រាកដ»។
អតីតប្រធានាធិបតីរុស្ស៊ី រូបនេះ ក៏បានបញ្ជាក់ថា បើសិន ប្រទេសហ្វាំងឡង់ និង ស៊ុយអែត ចូលជាសមាជិករបស់ ណាតូ នោះ រុស្ស៊ី នឹងរឹតបន្តឹងព្រំដែន និង «ត្រៀមសម្រាប់ជំហានឆ្លើយតប»។
«ប្រការនោះអាចរួមមានទាំងលទ្ធភាពនៃការបំពាក់មីស៊ីលល្បឿនជាងសំឡេង Iskander នៅពីមុខច្រកចូលរបស់ពួកគេតែម្ដង» លោក Medvedev ព្រមានដូច្នេះ។
ឧបទ្វីបគ្រីមៀ ត្រូវបាន រុស្ស៊ី រឹបអូសយកទៅធ្វើជារបស់ខ្លួនក្រោយការធ្វើប្រជាមតិកាលពីឆ្នាំ ២០១៤។ អ៊ុយក្រែន មិនទទួលយកប្រការនេះ និងចាត់ទុកថា គ្រីមៀ ត្រូវបាន រុស្ស៊ី កាន់កាប់ដោយខុសច្បាប់។ ប្រធានាធិបតីអ៊ុយក្រែន លោក ហ្សេឡែនស្គី កាលពីដើមខែនេះ បានប្រកាសថា នឹងវាយដណ្ដើមយក Donbass នៅភាគខាងកើត និងឧបទ្វីបគ្រីមៀ មកវិញឱ្យបាន។
សម្ដីរបស់លោក Medvedev ត្រូវបានលើកឡើងមួយថ្ងៃបន្ទាប់ពីក្រុមមន្ត្រីនៅតំបន់ គ្រីមៀ ឱ្យដឹងថា កងកម្លាំងអ៊ុយក្រែន បានវាយប្រហារលើទីតាំងខួងយកប្រេង Tavrida នៅតំបន់សមុទ្ររបស់ គ្រីមៀ។
អ៊ុយក្រែន កាលពីថ្ងៃទី ២០ មិថុនា បានវាយប្រហារលើទីតាំងខួងយកប្រេងនៅក្នុងដែនទឹករបស់ គ្រីមៀ ដោយជឿថា រុស្ស៊ី បំពាក់អាវុធការពារដែនអាកាស រ៉ាដា និងកម្លាំងប្រដាប់អាវុធនៅទីនោះ។ មេដឹកនាំរបស់ គ្រីមៀ បានឱ្យដឹងថា មនុស្ស ៧ នាក់បានបាត់ខ្លួន ក្រោយពីមានការវាយប្រហារ, ប្រព័ន្ធខួងប្រេងចំនួន ៣ បានរងការខូចខាត ក្នុងនោះមាន Tavrida ផងដែរ។ ក្រោយមក អគ្គិភ័យក៏បានលេបត្របាក់ប្រព័ន្ធខួងប្រេង BK-1 អស់ទាំងស្រុង៕