ប្រធានាធិបតីអ៊ុយក្រែន លោក ហ្សេឡែនស្គី និយាយថា ប្រទេសអង់គ្លេស ផ្ដល់អាវុធដែលប្រទេសនេះកំពុងត្រូវការចាំបាច់ដើម្បីប្រឆាំងនឹងកងកម្លាំងរបស់ រុស្ស៊ី និងបានអរគុណចំពោះ នាយករដ្ឋមន្ត្រី បូរីស ចន សុន ដោយសារ «យល់ពីតម្រូវការ»។
«ខ្ញុំដឹងគុណចំពោះ នាយករដ្ឋមន្ត្រី បូរីស ចន សុន ព្រោះតែបានយល់នូវតម្រូវការរបស់យើង និងត្រៀមជានិច្ចក្នុងការផ្ដល់ឱ្យ អ៊ុយក្រែន នូវប្រភេទអាវុធដែលយើងត្រូវការដើម្បីការពារប្រជាជន» ប្រធានាធិបតីអ៊ុយក្រែន លោក ហ្សេឡែនស្គី បានថ្លែងដូច្នេះកាលពីថ្ងៃទី ៦ មិថុនា។
មុននោះ ប្រទេសអង់គ្លេស បានឱ្យដឹងថា នឹងសហការជាមួយ សហរដ្ឋអាម៉េរិក ដើម្បីបញ្ជូនកាំជ្រួចហ្វូង M២៧០ រយៈចម្ងាយ ៨០ គីឡូម៉ែត្រ ទៅឱ្យ អ៊ុយក្រែន។ ប្រកាសនេះត្រូវបានធ្វើឡើងបន្ទាប់ពី ប្រធានាធិបតីរុស្ស៊ី លោក ពូទីន បានប្រកាសថា នឹងវាយប្រហារលើគោលដៅថ្មីនៅ អ៊ុយក្រែន បើសិនលោកខាងលិច ផ្ដល់អាវុធប្រភេទនេះឱ្យ អ៊ុយក្រែន។
ការប្រយុទ្ធគ្នារវាងកងកម្លាំងរបស់ អ៊ុយក្រែន និង រុស្ស៊ី កំពុងកើតឡើងយ៉ាងខ្លាំងក្លានៅតំបន់ Donbass ភាគខាងកើតនៃ ប្រទេសអ៊ុយក្រែន ពិសេសគឺនៅ Severodonetsk ដែលជាទីក្រុងធំបំផុតរបស់ខេត្ត Lugansk។ រុស្ស៊ី និងក្រុមផ្ដាច់ខ្លួន កំពុងវាយសន្ធប់លើ Severodonetsk បំណងគ្រប់គ្រងខេត្ត Lugansk ទាំងមូល។
អ៊ុយក្រែន ទទួលស្គាល់ថា កម្លាំងរបស់ រុស្ស៊ី មានប្រៀបជាង និងកំពុងដាក់សម្ពាធធ្ងន់ធ្ងរលើអង្គភាពនានារបស់ អ៊ុយក្រែន ដែលនៅការពារទីក្រុង Severodonetsk។
