ប្រធានាធិបតីអ៊ុយក្រែន អំពាវនាវឱ្យបង្កើនការដាក់ទណ្ឌកម្មលើ រុស្ស៊ី និងជំរុញការផ្ដល់ជំនួយសម្រាប់ អ៊ុយក្រែន ក្រោយពីបង្ហើបឱ្យដឹងអំពីការខូចខាតផ្នែកយោធាធំបំផុត បន្ទាប់ពីសង្គ្រាមផ្ទុះឡើងបាន ៣ ខែ។
«អ៊ុយក្រែន មិនមានពេលច្រើន។ ប្រវត្តិសាស្ត្រកំពុងស្ថិតនៅក្នុងរបត់ថ្មី។ នេះគឺជាដំណាក់កាលដែលសម្រេចថា កម្លាំងបាយអាចគ្រប់គ្រងពិភពលោកបាន ឬមិនបាន» ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី ថ្លែងក្នុងវេទិកាសេដ្ឋកិច្ចពិភពលោក (WEF) នៅ ប្រទេសស្វ៊ីស កាលពីថ្ងៃទី ២៣ ឧសភា។
លោក ហ្សេឡែនស្គី អំពាវនាវឱ្យថ្នាក់ដឹកនាំក្រុមហ៊ុនបរទេសនានា «ដកខ្លួនទាំងស្រុងចេញពី រុស្ស៊ី និងរើចូលមកកាន់ អ៊ុយក្រែន» ព្រមទាំងបានស្នើឱ្យអន្តរជាតិជួយបញ្ចប់ការបិទខ្ទប់បណ្ដាកំពង់ផែនៅឆ្នេរសមុទ្រខ្មៅ ដើម្បីបង្កើនល្បឿននាំចេញកសិផលរបស់ប្រទេសនេះ។
លោក ហ្សេឡែនស្គី ក៏បានសម្ដែងការដឹងគុណចំពោះជំនួយផ្នែកយោធា ប៉ុន្តែ អះអាងថា ទីក្រុងកៀវ ត្រូវការច្រើនជាងនេះ។ លោកថា «សង្គ្រាមបានបង្ហាញថា ជំនួយកាន់តែឆាប់ កាន់តែមានតម្លៃ។ បើសិនប្រទេសខ្ញុំទទួលបានជំនួយ ១០០% តាំងពីខែកុម្ភៈ ជីវិតមនុស្សរាប់ម៉ឺននាក់អាចត្រូវបានជួយសង្គ្រោះ។ នេះគឺជាមូលហេតុដែល អ៊ុយក្រែន ត្រូវការអាវុធគ្រប់ប្រភេទដែលបានស្នើសុំ ក្រៅពីប្រព័ន្ធអាវុធដែលបានផ្ដល់ឱ្យរួចហើយ»។
លោក ហ្សេឡែនស្គី ក៏បានប្រកាសថា មនុស្ស ៨៧ នាក់ បានស្លាប់ នៅពេលមីស៊ីលរបស់ រុស្ស៊ី វាយប្រហារលើមូលដ្ឋានទ័ពនៅ Desna ភាគខាងជើងអ៊ុយក្រែន កាលពីថ្ងៃទី ១៧ ឧសភា។ នេះគឺជាតួលេខនៃការស្លាប់ច្រើនបំផុតសម្រាប់កងទ័ពអ៊ុយក្រែន នៅក្នុងសង្គ្រាមដែលបានអូសបន្លាយពេលជិត ៣ ខែកន្លងមកនេះ។
ករណីបាត់បង់ជីវិតច្រើនបំផុតនាពេលកន្លង បានកើតឡើងកាលពីខែមីនា នៅពេល រុស្ស៊ី ផ្លោងគ្រាប់មីស៊ីលសំដៅតំបន់ជម្ឈមណ្ឌលរក្សាសន្តិភាព និងសន្តិសុខអន្តរជាតិ (IPSC) នៅក្បែរទីក្រុង Lviv ភាគខាងលិចអ៊ុយក្រែន សម្លាប់មនុស្សយ៉ាងតិច ៣៥ នាក់។
