រដ្ឋមន្ត្រីពីររូបរបស់ ប្រទេសអាល្លឺម៉ង់ ឱ្យដឹងថា ប្រទេសនេះបានត្រៀមខ្លួនរួចរាល់ហើយ សម្រាប់ការគាំទ្រ EU ដាក់ការហាមឃាត់ភ្លាមៗលើការនាំចូលប្រេងពី ប្រទេសរុស្ស៊ី។
«អាល្លឺម៉ង់ មិនប្រឆាំងនឹងការហាមឃាត់ប្រេងរបស់ រុស្ស៊ី។ ថ្វីបើវាគឺជាអម្រែកធ្ងន់ ប៉ុន្តែ យើងត្រៀមខ្លួនជានិច្ចក្នុងការអនុវត្តតាម» រដ្ឋមន្ត្រីក្រសួងសេដ្ឋកិច្ចរបស់ អាល្លឺម៉ង់ Robert Habeck បានប្រាប់អ្នកយកព័ត៌មានកាលពីថ្ងៃទី ២ ឧសភា នៅពេលចូលរួមកិច្ចប្រជុំជាមួយក្រុមមន្ត្រីរបស់ សហភាពអឺរ៉ុប (EU) នៅ ព្រុចសែល ប្រទេសបែលហ្ស៊ិក។
លោក Robert Habeck បន្តថា អាល្លឺម៉ង់ នឹងគាំទ្របទបញ្ជារបស់ EU បើទោះវាកើតឡើងភ្លាមៗ ឬនៅចុងឆ្នាំនេះ។
រដ្ឋមន្ត្រីក្រសួងហិរញ្ញវត្ថុរបស់ អាល្លឺម៉ង់ Christian Lindner ក៏បានថ្លែងថា អាល្លឺម៉ង់ ពិតជាអាចស៊ូទ្រាំបានជាមួយនឹងបទបញ្ជាហាមឃាត់ភ្លាមៗ លើវិស័យប្រេងរបស់ រុស្ស៊ី។ «ពេលនេះ យើងអាចបោះបង់ធ្យូងថ្ម និងប្រេងដែលនាំចូលពី ប្រទេសរុស្ស៊ី សូម្បីតែនៅពេលប្រេងឡើងថ្លៃ» លោកអះអាងដូច្នេះ។
អ្នកការទូតពីររូបរបស់ EU កាលពីចុងសប្ដាហ៍កន្លង បានឱ្យដឹងថា សហភាពអឺរ៉ុប កំពុងឆ្ពោះទៅរកបទបញ្ជាហាមឃាត់ការនាំចូលប្រេងពី រុស្ស៊ី នៅចុងឆ្នាំនេះ ក្នុងបំណងរួមចំណែកក្នុងការអនុវត្តកញ្ចប់ទណ្ឌកម្មទី ៦ សំដៅលើ ទីក្រុងមូស្គូ ព្រោះតែបានចូលឈ្លានពានលើ អ៊ុយក្រែន៕
