រដ្ឋមន្ត្រីការបរទេសរុស្ស៊ី Lavrov យល់ថា ហានិភ័យកើនមានសង្គ្រាមលោកលើកទីបី ជាមួយនឹងអាវុធប្រល័យលោកគឺពិតជាខ្ពស់ ហើយទីក្រុងមូស្គូ កំពុងស្វែងរកវិធីដើម្បីទប់ស្កាត់បញ្ហានេះ។
«ហានិភ័យផ្ទុះសង្គ្រាមលោកលើកទីបី និងសង្គ្រាមនុយក្លេអែរ គឺជាការជាក់ស្ដែង និងធ្ងន់ធ្ងរបំផុត មិនអាចមើលស្រាលបានឡើយ។ ខ្ញុំមិនចង់ឱ្យហានិភ័យនេះកើនឡើងខ្ពស់ មនុស្សជាច្រើនចង់ឱ្យវាកើតឡើង» រដ្ឋមន្ត្រីការបរទេសរុស្ស៊ី Sergei Lavrov ថ្លែងនៅក្នុងកិច្ចសម្ភាសជាមួយទូរទស្សន៍រុស្ស៊ី កាលពីម្សិលមិញ។
ការថ្លែងរបស់លោក Lavrov ត្រូវបានលើកឡើងនៅពេលត្រូវគេសួរអំពីសារសំខាន់នៃការទប់ស្កាត់សង្គ្រាមលោកលើកទីបី ក៏ដូចជាថា តើស្ថានការណ៍តានតឹងបច្ចុប្បន្ន អាចដូចទៅនឹង វិបត្តិមីស៊ីលគុយបា កាលពីឆ្នាំ ១៩៦២ ឬអត់។ លោក Lavrov ប្រាប់ថា «ធ្លាប់មានខ្សែទំនាក់ទំនងដែលទទួលបានការជឿជាក់ពីក្រុមមេដឹកនាំ» រវាង សូវៀត និង អាម៉េរិក នៅក្នុង វិបត្តិមីស៊ីលគុយបា ប៉ុន្តែ បច្ចុប្បន្នមិនមានទេ។
លោកបានបន្ថែមថា «កាលណោះមានការកំណត់ច្បាស់លាស់សមល្មម ហើយ ម៉ូស្គូ និង វ៉ាស៊ីងតោន សុទ្ធតែយល់អំពីសកម្មភាពរបស់គូភាគី។ ពេលនេះនៅសល់តែការកំណត់មួយចំនួន ដូចជា កិច្ចព្រមព្រៀងកាត់បន្ថយអាវុធយុទ្ធសាស្ត្រថ្មី (New START) ចំណែកយន្តការគ្រប់គ្រង និងទប់ស្កាត់ការរីកសាយភាយអាវុធ សុទ្ធតែត្រូវបានបំផ្លាញចោលអស់ហើយ»។
លោក Lavrov ចោទថា ណាតូ កំពុងចូលរួមធ្វើសង្គ្រាមប្រឆាំង រុស្ស៊ី តាមរយៈកម្លាំងជំនួសមុខ និងបញ្ជាក់ថា រថយន្តដឹកអាវុធដែលលោកខាងលិច ផ្ដល់ឱ្យ អ៊ុយក្រែន នឹងត្រូវបានចាត់ទុកថាជាគោលដៅយោធាស្របច្បាប់។
ភាគីអាម៉េរិក និងសម្ព័ន្ធមិត្ត មិនទាន់បញ្ចេញប្រតិកម្មអ្វីទៅនឹងសម្ដីរបស់លោក Lavrov ប៉ុន្តែ រដ្ឋមន្ត្រីការបរទេសអ៊ុយក្រែន Dmytro Kuleba យល់ថា ទីក្រុងមូស្គូ បាន «បាត់បង់ក្ដីសង្ឃឹមក្នុងការទប់ស្កាត់ការគាំទ្ររបស់ពិភពលោក ចំពោះ ទីក្រុងកៀវ»។
