រថយន្តដឹកទំនិញមួយគ្រឿង បានប៉ះជាមួយរថភ្លើងមួយខ្សែនៅភាគអាគ្នេយ៍នៃ ប្រទេសហុងគ្រី បណ្ដាលឱ្យរថភ្លើងធ្លាក់ចេញពីផ្លូវដែក ខណៈមនុស្សច្រើននាក់នៅលើរថយន្តបានបាត់បង់ជីវិត។
ប៉ូលិសបានឱ្យដឹងថា គ្រោះថ្នាក់នេះកើតឡើងនៅម៉ោង ៧ ព្រឹក (ម៉ោងប្រហែល ១២ នៅ ភ្នំពេញ) នៅតំបន់ផ្លូវប្រសព្វគ្នាក្នុងទីរួមស្រុក Mindszent ភាគខាងអាគ្នេយ៍របស់ ប្រទេសហុងគ្រី ដែលមានចម្ងាយប្រហែល ១៤០ គីឡូម៉ែត្រ ពី រដ្ឋធានី Budapest។
«ការជួយសង្គ្រោះកំពុងត្រូវបានធ្វើឡើង ហើយយើងមិនទាន់អាចបញ្ជាក់បាននៅឡើយថា មានមនុស្សប៉ុន្មាននាក់បានស្លាប់» អ្នកនាំពាក្យរបស់ប៉ូលិស ឱ្យដឹងដូច្នេះ។
យោងតាមក្រុមហ៊ុនគ្រប់គ្រងផ្លូវដែក នៅក្នុងរថភ្លើងខាងលើមានអ្នកដំណើរចំនួន ២០ នាក់ ក្នុងនោះមាន ២ នាក់រងរបួសធ្ងន់ និង ៨ នាក់ រងរបួសស្រាល។
