អភិបាលរដ្ឋធានីកៀវ និយាយថា កងទ័ពអ៊ុយក្រែន បានវាយបក រុញច្រានកងទ័ពរបស់ រុស្ស៊ី ចេញពីតំបន់ជាច្រើនរបស់រដ្ឋធានី ខណៈដែលទីក្រុង Mariupol បន្តរងការឡោមព័ទ្ធពី កម្លាំងរុស្ស៊ី។
អភិបាលរដ្ឋធានីកៀវ Vitali Klitschko កាលពីថ្ងៃទី ២៣ មីនា បានឱ្យដឹងថា ការប្រយុទ្ធគ្នាយ៉ាងខ្លាំងក្លាកំពុងកើតឡើងនៅតំបន់នានានៅជាយក្រុង និងនៅរដ្ឋធានីរបស់ អ៊ុយក្រែន។ «ទីក្រុង Makariv និងស្ទើរតែទាំងមូលនៃទីក្រុង Irpin កំពុងស្ថិតក្នុងការគ្រប់គ្រងរបស់ កងទ័ពអ៊ុយក្រែន» លោកអភិបាលរដ្ឋធានីបញ្ជាក់។
ទីក្រុង Irpin មានព្រំប្រទល់ជាប់នឹងភាគខាងកើតរបស់ កៀវ ចំណែក Makariv មានចម្ងាយពីរដ្ឋធានីប្រហែល ៥០ គីឡូម៉ែត្រ ទៅទិសខាងលិច។ ការប្រយុទ្ធគ្នាខ្លាំងក្លាក៏កើតឡើងនៅទីក្រុង Irpin និងទីក្រុង Lyutizh នៅភាគខាងជើងរដ្ឋធានីកៀវ។
សារព័ត៌មានអ៊ុយក្រែន បានផ្សាយថា កងទ័ពអ៊ុយក្រែន ទំនងជាកំពុងឡោមព័ទ្ធកម្លាំងរបស់ រុស្ស៊ី នៅទីក្រុង Irpin ក៏ដូចជាតំបន់ Bucha និង Hostomel ដែលស្ថិតនៅភាគខាងលិចនៃជាយរដ្ឋធានី។
រុស្ស៊ី នៅមិនទាន់ដណ្ដើមបានទីក្រុងយុទ្ធសាស្ត្រណាមួយរបស់ អ៊ុយក្រែន បន្ទាប់ពីការចូលឈ្លានពានជិត ១ ខែមកនេះ និងមិនទាន់មានការវាយសម្រុកគួរឱ្យចាប់អារម្មណ៍ណាមួយក្នុងអំឡុង ១ សប្ដាហ៍កន្លង។
កងទ័ពអ៊ុយក្រែន អះអាងថា កងកម្លាំងរុស្ស៊ី នៅសល់ស្បៀង ប្រេង និងគ្រាប់រំសេវដែលអាចប្រើប្រាស់បានតែ ៣ ថ្ងៃទៀតប៉ុណ្ណោះ។
