វិមានក្រឹមឡាំង ឱ្យដឹងថា រុស្ស៊ី នឹងប្រើប្រាស់អាវុធនុយក្លេអែរ ទាក់ទិននឹងសង្គ្រាមនៅ អ៊ុយក្រែន បើសិនប្រទេសនេះប្រឈមមុខនឹង «ការគំរាមកំហែងស្លាប់រស់»។
«យើងបានប្រកាសអំពីនិយមន័យស្ដីពីសន្តិសុខក្នុងស្រុក ក្នុងនោះក៏មានការកំណត់អំពីមូលហេតុដែលនឹងត្រូវប្រើប្រាស់អាវុធនុយក្លេអែរ» អ្នកនាំពាក្យរបស់ វិមានក្រឹមឡាំង Dmitry Peskov បានប្រាប់ CNN កាលពីថ្ងៃទី ២២ មីនា។ «ដូច្នេះ បើសិនមានការគំរាមកំហែងស្លាប់រស់ ចំពោះប្រទេសរបស់យើង នោះអាវុធនុយក្លេអែរ អាចត្រូវបានប្រើប្រាស់ទៅតាមនិយមន័យនោះ»។
ប្រកាសរបស់ Peskov ត្រូវបានលើកឡើងបន្ទាប់ពីអ្នកយកព័ត៌មានសួរជាបន្តបន្ទាប់ថា «តើលោកជឿថា» ប្រធានាធិបតីរុស្ស៊ី វ្ល៉ាឌីមៀ ពូទីន នឹងមិនប្រើប្រាស់អាវុធនុយក្លេអែរ ទាក់ទងនឹងសង្គ្រាមនៅ អ៊ុយក្រែន។ ប៉ុន្តែ Peskov មិនបាននិយាយច្បាប់អំពី «ការគំរាមកំហែងស្លាប់រស់» ចំពោះ រុស្ស៊ី ក្នុងកាលៈទេសៈនេះគឺជាអ្វី។
កាលពីថ្ងៃទី ២៨ កុម្ភៈ ប្រធានាធិបតីរុស្ស៊ី បានប្រកាសដាក់កម្លាំងនុយក្លេអែរយុទ្ធសាស្ត្រ ក្នុងស្ថានការណ៍អាសន្នកម្រិតខ្ពស់ ធ្វើឱ្យមានការបារម្ភអំពីការផ្ទុះសង្គ្រាមនុយក្លេអែរ។
អ្នកនាំពាក្យរបស់ សេតវិមាន John Kirby បានអះអាងថា វិធីបកស្រាយរបស់ ទីក្រុងមូស្គូ អំពីលទ្ធភាពនៃការប្រើប្រាស់អាវុធនុយក្លេអែរ គឺជា «រឿងគ្រោះថ្នាក់»។
រុស្ស៊ី មានក្បាលគ្រាប់នុយក្លេអែរ ច្រើនជាងគេបង្អស់ក្នុងពិភពលោក ប្រហែលជាង ៤,៤០០ គ្រាប់ និង កាំជ្រួចផ្លោងអន្តរទ្វីប (ICBM) យ៉ាងច្រើនផងដែរ។
សង្គ្រាមនៅ អ៊ុយក្រែន ហាក់មិនមានសញ្ញាថមថយ ក្រោយពី រុស្ស៊ី បានបើកយុទ្ធនាការយោធាកាលពីថ្ងៃទី ២៤ កុម្ភៈ។ រុស្ស៊ី បានគ្រប់គ្រងទីក្រុង Kherson នៅភាគខាងត្បូង ឡោមព័ទ្ធទីក្រុងសំខាន់ៗមួយចំនួន និងកំពុងសម្រុកចូលទីក្រុង Mariupol របស់ អ៊ុយក្រែន នាថ្ងៃនេះ។