ក្រសួងការពារជាតិរុស្ស៊ី បានចេញការកំណត់ពេលវេលាចុងក្រោយនៅព្រឹកនេះ សម្រាប់ការទម្លាក់អាវុធចុះចាញ់របស់ កងកម្លាំងអ៊ុយក្រែន នៅក្នុងទីក្រុងកំពង់ផែ ម៉ារីប៉ូល ប៉ុន្តែ ត្រូវបាន ទីក្រុងកៀវ បដិសេធ។
RIA Novosti កាលពីថ្ងៃទី ២០ មីនា ដកស្រង់សម្ដីរបស់វរសេនីយ៍ឯក Mikhail Mizintsev ប្រធានមជ្ឈមណ្ឌលគ្រប់គ្រងផ្នែកការពារជាតិរុស្ស៊ី ស្នើឱ្យក្រុមមន្ត្រី និងកងកម្លាំងការពារទីក្រុង ម៉ារីប៉ូល ទម្លាក់អាវុធចុះចាញ់ឱ្យបានមុនម៉ោង ៥ ថ្ងៃទី ២១ មីនា (ម៉ោង ៩ ព្រឹក នៅ ភ្នំពេញ)។
«អ្នកដែលបានទម្លាក់អាវុធចុះចាញ់ សុទ្ធតែត្រូវបានធានាសុវត្ថិភាពសម្រាប់ការចាកចេញពី ម៉ារីប៉ូល» វរសេនីយ៍ឯក Mizintsev និយាយដូច្នេះ។ លោកបន្ថែមថា ច្រកសម្រាប់មនុស្សធម៌នឹងត្រូវបានបើកទៅតាមទិសខាងកើត និងខាងលិច ដើម្បីចាកចេញពី ម៉ារីប៉ូល នៅវេលាម៉ោង ១០ ព្រឹក (ម៉ោង ១៤ នៅ កម្ពុជា)។
ម៉ារីប៉ូល ដែលស្ថិតនៅក្នុងទីតាំងយុទ្ធសាស្ត្រលើឆ្នេរសមុទ្រ អាហ្សូវ (Azov) បានក្លាយជាគោលដៅដែលត្រូវបាន កងទ័ពរុស្ស៊ី ឡោមព័ទ្ធតាំងពីដើមខែមីនា បន្ទាប់ពី រុស្ស៊ី បានបើកយុទ្ធនាការយោធាពិសេសនៅ អ៊ុយក្រែន កាលពីថ្ងៃទី ២៤ កុម្ភៈ។ ពលរដ្ឋប្រហែល ៤០០,០០០ នាក់ ត្រូវបានគេជឿថា កំពុងជាប់នៅក្នុងទីក្រុង ម៉ារីប៉ូល ក្នុងការវាយប្រហារតាមផ្លូវអាកាសរបស់ កងទ័ពរុស្ស៊ី ហើយពួកគេកំពុងជួបបញ្ហាគ្មានទឹក ភ្លើង និងប្រព័ន្ធកម្ដៅសម្រាប់ការប្រើប្រាស់ប្រចាំថ្ងៃ។
ឆ្លើយតបនឹងការដាក់ឱសានវាទរបស់ រុស្ស៊ី ខាងលើ ឧបនាយករដ្ឋមន្ត្រីអ៊ុយក្រែន Irina Vereshchuk បានទាត់ចោលការកំណត់ពេលវេលាចុងក្រោយនេះ។ «នឹងមិនមានការចុះចាញ់ ឬទម្លាក់អាវុធនោះឡើយ យើងបានប្រកាសប្រាប់ភាគី រុស្ស៊ី អំពីបញ្ហានេះ» លោកស្រី Irina បានប្រាប់ទំព័រ Pravda របស់ អ៊ុយក្រែន ដូច្នេះ។
អ៊ុយក្រែន បានប្រកាសកាលពីថ្ងៃទី ១៨ មីនាថា បានបាត់បង់ការគ្រប់គ្រង «បណ្ដោះអាសន្ន» លើសមុទ្រ អាហ្សូវ (Azov) នៅពេល កងទ័ពរុស្ស៊ី បាន និងកំពុងឡោមព័ទ្ធទីក្រុង ម៉ារីប៉ូល ដែលនៅជាប់នឹងសមុទ្រនេះ។
ក្រោយរយៈពេល ៣ សប្ដាហ៍នៃការបើកយុទ្ធនាការយោធានៅ អ៊ុយក្រែន កងទ័ពរុស្ស៊ី បានគ្រប់គ្រងតំបន់ ខឺសុន (Kherson) នៅភាគខាងកើត ក្នុងគ្រាដែលកំពុងបន្តយុទ្ធសាស្ត្រឡោមព័ទ្ធទីក្រុងធំៗជាច្រើនផ្សេងទៀត ក្នុងនោះមានទាំង រដ្ឋធានីកៀវ និង ខាកូវ (Kharkov) ផងដែរ។ កងកម្លាំងរុស្ស៊ី នៅជុំវិញរដ្ឋធានី របស់ អ៊ុយក្រែន ហាក់មិនបានផ្លាស់ប្ដូរទីតាំងក្នុងរយៈពេល ២ សប្ដាហ៍មកនេះ។
