ឧកញ៉ា មហាសេដ្ឋី និងអ្នកមានអំណាច ចំនួនរាប់រយនាក់ នៅ រុស្ស៊ី នឹងត្រូវរងការដាក់ទណ្ឌកម្មពី រដ្ឋាភិបាលអង់គ្លេស បន្ទាប់ពី អង់គ្លេស អនុម័តសេចក្ដីព្រាងច្បាប់មួយដែលសំដៅលើទ្រព្យសម្បត្តិ ប្រាក់កាសរបស់ក្រុមនេះ។
សារព័ត៌មាន Dailymail បានរាយការណ៍ថា ទណ្ឌកម្មនឹងធ្វើឱ្យទ្រព្យសម្បត្តិរបស់បុគ្គល និងស្ថាប័នជាច្រើនរបស់ រុស្ស៊ី ត្រូវបានបង្កក ក្នុងគ្រាដែល រដ្ឋាភិបាលអង់គ្លេស ត្រៀមយកពន្ធលើទំនិញច្រើនមុខរបស់ រុស្ស៊ី ក្នុងនោះមានស្រា vodka និងពងត្រីប្រៃផងដែរ។
រាជវាំងអង់គ្លេស បានគាំទ្រដល់សេចក្ដីព្រាងច្បាប់ស្ដីពីឧក្រិដ្ឋកម្មសេដ្ឋកិច្ច ក្នុងពេលដែលសភាជាន់ទាបអង់គ្លេស ធ្វើការរហូតដល់ពាក់កណ្ដាលយប់ ដើម្បីធានាថា វិធានការទាំងនេះបានក្លាយជាច្បាប់។
រដ្ឋាភិបាលអង់គ្លេស គ្រោងនឹងប្រកាសវិធានការមួយចំនួនបន្ថែមទៀត ដើម្បីឆ្លើយតបនឹងយុទ្ធនាការយោធាពិសេសរបស់ រុស្ស៊ី នៅ អ៊ុយក្រែន។
យោងតាមសេចក្ដីព្រាងច្បាប់ថ្មី អង់គ្លេស នឹងបង្កើតប្រព័ន្ធថ្មីមួយដើម្បីចុះបញ្ជីស្ថាប័នបរទេស តម្រូវឱ្យម្ចាស់អចលនទ្រព្យបរទេសនៅ អង់គ្លេស រាយការណ៍អំពីអត្តសញ្ញាណពិត។ ប្រព័ន្ធនេះនឹងត្រូវធ្វើបច្ចុប្បន្នភាពប្រចាំឆ្នាំ និងមានការដាក់ពិន័យលើបុគ្គលដែលមិនបានរបាយការណ៍លម្អិត ឬផ្ដល់ព័ត៌មានមិនត្រឹមត្រូវ។ បុគ្គល ឬស្ថាប័នដែលអនុវត្តខុសច្បាប់នេះនឹងត្រូវបង្កកទ្រព្យសម្បត្តិ ដោយមិនអាចលក់ ឬជួលអចលនទ្រព្យឱ្យអ្នកផ្សេង។
សេចក្ដីព្រាងច្បាប់ខាងលើនឹងជួយឱ្យ រដ្ឋាភិបាលអង់គ្លេស មានភាពងាយស្រួលក្នុងការអនុវត្តវិធានការពិន័យលើក្រុមមហាសេដ្ឋី និងអ្នកមានអំណាចរុស្ស៊ី ដែលទាក់ទិននឹងសង្គ្រាមនៅ អ៊ុយក្រែន។
រដ្ឋាភិបាលអង់គ្លេស ក៏គ្រោងនឹងយកពន្ធតម្លៃ ៥ ពាន់លានផោន ចំពោះស្រា vodka, រោមសត្វ និងទំនិញជាច្រើនទៀតរបស់ រុស្ស៊ី នៅក្នុងក្របខណ្ឌនៃការដាក់ទណ្ឌកម្មថ្មី។ ទំនិញប្រណិត តម្លៃថ្លៃរបស់ រុស្ស៊ី មានដូចជា ពងត្រីប្រៃ និងត្បូងពេជ្រជាដើម ក៏នឹងត្រូវបានហាមឃាត់។
មហាសេដ្ឋីរុស្ស៊ី ជាច្រើនរូប ដូចជា Milhail Fridman ឬ Petr Aven និងអ្នកនយោបាយជាន់ខ្ពស់ដូចជា អ្នកនាំពាក្យ Dmitry Peskov របស់ ប្រធានាធិបតីរុស្ស៊ី ពូទីន ជាដើម ក៏អាចរងទណ្ឌកម្មពីច្បាប់ថ្មីរបស់ អង់គ្លេស៕