ក្រសួងការពារជាតិរុស្ស៊ី បានប្រកាសថា កងទ័ពសាធារណរដ្ឋប្រជាមានិត Donetsk ដណ្ដើមបានទីក្រុង Volnovakha នៅភាគខាងកើតរបស់ អ៊ុយក្រែន ក្រោយការប្រយុទ្ធគ្នាអស់រយៈពេលជាង ២ សប្ដាហ៍។
ឧត្តមសេនីយ៍ទោ Igor Konashenkov អ្នកនាំពាក្យក្រសួងការពារជាតិរុស្ស៊ី កាលពីថ្ងៃទី ១១ មីនា បានប្រកាសថា ក្រុមទាហានរបស់សាធារណរដ្ឋប្រជាមានិត Donetsk បាន «រំដោះ» ទីក្រុង Volnovakha និងតំបន់ប្រជុំជនមួយចំនួននៅជុំវិញទីក្រុងនេះ។ សាធារណរដ្ឋប្រជាមានិត Donetsk ត្រូវបានផ្ដាច់ខ្លួន និងបង្កើតឡើងនៅភាគខាងកើតរបស់ អ៊ុយក្រែន ហើយទើបត្រូវបាន រុស្ស៊ី ទទួលស្គាល់កាលពីពេលថ្មីៗនេះ។
Volnovakha ជាទីក្រុងដែលមានផ្ទៃក្រឡាប្រហែល ២១ គីឡូម៉ែត្រ និងមានប្រជាជនសរុបជិត ២២,០០០ នាក់ ហាក់ត្រូវបានឡោមព័ទ្ធតាំងតែពីថ្ងៃដែល រុស្ស៊ី ចាប់ផ្ដើមយុទ្ធនាការយោធា នៅ អ៊ុយក្រែន កាលពីថ្ងៃទី ២៤ កុម្ភៈ។ ការប្រយុទ្ធដណ្ដើមកាន់កាប់ទីក្រុងនេះ កើតឡើងយ៉ាងខ្លាំងក្លា នៅប៉ុន្មានថ្ងៃកន្លងទៅនេះ។
ឧត្តមសេនីយ៍ Konashenkov បន្ថែមថា បច្ចុប្បន្ន កម្លាំងផ្ដាច់ខ្លួន Donetsk សម្រុកទៅមុខបានប្រហែល ៦ គីឡូម៉ែត្រទៀត និងបន្តឡោមព័ទ្ធ Mariupol ជាទីក្រុងនៅភាគខាងត្បូង ធៀបនឹងទីក្រុង Volnovakha របស់ អ៊ុយក្រែន។
ប្រធានាធិបតីអ៊ុយក្រែន លោក ហ្សេឡែនស្គី កាលពីថ្ងៃទី ១១ មីនា ថ្លែងថា ក្បួនរថយន្តជំនួយមនុស្សធម៌ មិនអាចចូលទៅក្នុងទីក្រុង Volnovakha ប៉ុន្តែ មិនបានទទួលស្គាល់ថា ទីក្រុងនេះត្រូវបានធ្លាក់ទៅលើដៃរបស់កងទ័ពផ្ដាច់ខ្លួន Donetsk នោះទេ។
