រដ្ឋមន្ត្រីការបរទេសអាម៉េរិក បាននិយាយថា សហរដ្ឋអាម៉េរិក បាន «បើកភ្លើងខៀវ» ឱ្យ ប៉ូឡូញ ដែលជាសមាជិករបស់ ណាតូ ជញ្ជូនយន្តហោះចម្បាំងរបស់ខ្លួន (ប៉ូឡូញ) ទៅឱ្យ អ៊ុយក្រែន ហើយ ក្រុងវ៉ាស៊ីងតោន នឹងផ្ដល់យន្តហោះផ្សេងទៅឱ្យ ប៉ូឡូញ វិញ។
ដំណឹងខាងលើត្រូវបានរដ្ឋមន្ត្រីការបរទេសអាម៉េរិក លោក Antony Blinken លើកឡើងនៅក្នុងកិច្ចសម្ភាសកាលពីថ្ងៃទី ៦ មីនា បន្ទាប់ពី មេដឹកនាំអ៊ុយក្រែន បានអំពាវនាវឱ្យ អាម៉េរិក ដាក់ទណ្ឌកម្មឱ្យធ្ងន់ធ្ងរជាងបច្ចុប្បន្នទៅលើ រុស្ស៊ី និងបង្កើនជំនួយផ្នែកការពារជាតិដល់ ទីក្រុងកៀវ។
មុននោះ លោក ហ្សេឡែនស្គី ក៏បានតឿនឱ្យ អាម៉េរិក បង្កើតតំបន់ហាមហោះហើរនៅ អ៊ុយក្រែន ផងដែរ ប៉ុន្តែ ក្រុងវ៉ាស៊ីងតោន និង ណាតូ ធ្លាប់បានផាត់ចោលលទ្ធភាពនេះ ព្រមទាំងប្រកាសថា នឹងមិនបញ្ជូនទាហានទៅចូលរួមធ្វើសង្គ្រាមនៅ អ៊ុយក្រែន។
យ៉ាងណាក៏ដោយ ការដែល អាម៉េរិក «បើកភ្លើងខៀវ» ឱ្យជញ្ជូនយន្តហោះចម្បាំងទៅឱ្យ អ៊ុយក្រែន ក៏ ណាតូ នឹងត្រូវជាប់ឧបសគ្គធំៗពីរគឺ ការស្វែងរកប្រភេទយន្តហោះដែលទាហានរបស់ អ៊ុយក្រែន អាចបញ្ជាបាន និងការស្វែងរកប្រទេសដែលស្ម័គ្រចិត្តផ្ទេរយន្តហោះចម្បាំងរបស់ខ្លួនទៅឱ្យ ទីក្រុងកៀវ។