ក្រោយមានការរិះគន់ច្រើនថា «បោះបង់» អ៊ុយក្រែន ប្រទេសជាច្រើននៅលោកខាងលិច បាននាំគ្នាផ្ដល់ជំនួយជាអាវុធដល់ រដ្ឋធានីកៀវ ជាបន្តបន្ទាប់ ក្នុងគ្រាដែល រុស្ស៊ី និងអ៊ុយក្រែន ជិតបើកកិច្ចចរចា។
ប្រធានគណៈកម្មការអឺរ៉ុប Ursula von der Leyen កាលពីថ្ងៃទី ២៧ កុម្ភៈ ប្រកាសថា សហភាពអឺរ៉ុប (EU) បានសម្រេចថានឹងចំណាយ ៥០០ លានដុល្លារ ដើម្បីឱ្យសមាជិកទាំងឡាយ ទិញ និងប្រគល់អាវុធដល់ អ៊ុយក្រែន។ នេះគឺជាលើកដំបូងហើយដែល EU បានសម្រេចដូច្នេះនៅក្នុងប្រវត្តិសាស្ត្រ។
តំណាងជាន់ខ្ពស់ផ្នែកគោលនយោបាយការបរទេស និងសន្តិសុខរបស់ EU លោក Josep Borrell ក៏បានឱ្យដឹងថា សហភាពអឺរ៉ុប នឹងបញ្ជូនយន្តហោះចម្បាំងឱ្យទៅ កងទ័ពអ៊ុយក្រែន ដើម្បីទប់ទល់នឹង កងទ័ពឈ្លានពានរុស្ស៊ី។
ដាណឺម៉ាក និង ស្វ៊ីស ប្រកាសថា នឹងផ្ដល់អាវុធប្រឆាំងរថក្រោះ ជិត ៨,០០០ ដើម រួមនឹងសម្ភារៈយោធាជាច្រើនទៀត ដល់ អ៊ុយក្រែន។ ការផ្ដល់ជំនួយនេះ ត្រូវបានធ្វើឡើងបន្ទាប់ពី អាល្លឺម៉ង់ កាលពីដើមខែនេះត្រូវបានរិះគន់ថា បានផ្ដល់ជំនួយជាមួកដែកប្រហែលតែ ៥,០០០ ដល់ អ៊ុយក្រែន ធ្វើឱ្យ Vitali Klitschko ដែលជាអភិបាលរដ្ឋធានីកៀវ «មិនអាចចេញស្ដីបាន»។
ប៉ុន្មានសប្ដាហ៍បន្ទាប់នោះ នៅពេលមានការប្រឹងប្រែងផ្នែកការទូត បារាំង អាល្លឺម៉ង់ និងប្រទេសជាច្រើននៅបស្ចិមលោក នៅតែមានការរារែកក្នុងការបញ្ជូនអាវុធឱ្យ អ៊ុយក្រែន ព្រោះខ្លាចធ្វើឱ្យ វិមានក្រឹមឡាំង កាន់តែក្ដៅក្រហាយ។
ក៏ប៉ុន្តែ ក្រោយពីលោក ពូទីន បានប្រកាសសង្គ្រាម គ្រប់យ៉ាងក៏បានប្ដូរផ្លាស់។ កាលពីថ្ងៃទី ២៦ កុម្ភៈ អាល្លឺម៉ង់ និយាយថា នឹងផ្ដល់អាវុធប្រឆាំងរថក្រោះចំនួន ១,០០០ ដើម និង មីស៊ីល ស្ពាយលើស្មា ៥០០ ដើម ដល់ អ៊ុយក្រែន។ បារាំង ក៏កំពុងផ្ដល់អាវុធការពារបន្ថែមទៀត ដល់ ទីក្រុងកៀវ។
ប្រធានាធិបតីអ៊ុយក្រែន ហ្សេឡែនស្គី ថ្លែងថា ប្រទេសជាដៃគូ កំពុងបញ្ជូនអាវុធមកឱ្យ អ៊ុយក្រែន ដើម្បីប្រឆាំងនឹងយុទ្ធនាការយោធារបស់ រុស្ស៊ី។ «អាវុធ និងសម្ភារៈយោធាពីបណ្ដាដៃជាគូសហការ កំពុងធ្វើដំណើរមកកាន់ អ៊ុយក្រែន។ សម្ព័ន្ធមិត្តប្រឆាំងសង្គ្រាមកំពុងដំណើរការ»។
បែលហ្ស៊ិក ក្រោយមកក៏បានប្រកាសជញ្ជូនកាំភ្លើងយន្ត ២,០០០ ដើម និងឥន្ធនៈ ៣,៨០០ តោន ដល់កងទ័ពអ៊ុយក្រែន។ ចំណែក ហូឡង់ ក៏បានផ្ដល់កាំភ្លើងបាញ់រះ និងមួកដែក ខណៈដែល មីស៊ីលស្ពាយលើស្មា Stinger នឹងត្រូវបានប្រគល់ក្នុងពេកឆាប់ៗនេះ។
សាធារណរដ្ឋឆែក ក៏ផ្ដល់កាំភ្លើងខ្លី ៣០,០០០ ដើម, កាំភ្លើងវែង ៣,០០០ ដើម, កាំភ្លើងយន្ត ៣,០០០ ដើម រួមនឹងកាំភ្លើងបាញ់រះរាប់សិបដើម និងគ្រាប់កាំភ្លើងប្រហែល ១ លានប្រអប់ផងដែរ ដល់ អ៊ុយក្រែន។
អាម៉េរិក កំពុងផ្ដល់សម្ភារៈយោធាដែលមានតម្លៃ ៣៥០ លានដុល្លារ ដល់ ទីក្រុងកៀវ ខណៈដែល អង់គ្លេស ថា បានត្រៀមជាស្រេចដើម្បីផ្ដល់ជំនួយយោធាបន្ថែមដល់ អ៊ុយក្រែន ក្នុងនោះមានទាំងអាវុធធុនធ្ងន់ទៀតផង។