ក្នុងថ្ងៃទី ៤ ដែល កងទ័ពរុស្ស៊ី វាយប្រហារលើ អ៊ុយក្រែន គេឃើញថា ប្រជាជនរបស់ប្រទេសនេះ នាំគ្នាជីកលេណដ្ឋាន និងច្នៃគ្រាប់បែកសាំង នៅតាមដងផ្លូវ ខណៈដែលប្រជាជនមួយចំនួន នៅតែបន្តរត់ចោលទឹកដី។
កាលពីថ្ងៃទី ២៧ កុម្ភៈ យុទ្ធនាការយោធារបស់ រុស្ស៊ី នៅ អ៊ុយក្រែន បានឈានដល់ថ្ងៃទី ។ កងទ័ពរុស្ស៊ី បានបើកការវាយប្រហារថ្មីទៅលើព្រលានយន្តហោះ និងទីតាំងប្រេងរបស់ អ៊ុយក្រែន ក្រោយពីជួបនឹងការប្រឆាំងតបតយ៉ាងខ្លាំងក្លាក្នុងរយៈពេល ៣ ថ្ងៃដំបូង។
ទ័ពរុស្ស៊ី កាលពីថ្ងៃទី ២៧ កុម្ភៈ បានសម្រុកចូល Kharkov ដែលជាទីក្រុងធំលំដាប់ទី ២ របស់ អ៊ុយក្រែន។ ប៉ុន្តែ ក្រោយមក អ៊ុយក្រែន ប្រកាសថា ទ័ពរុស្ស៊ី ត្រូវបានវាយរុញច្រានចេញពី Kharkov បន្សល់ទុករថយន្តយោធាជាច្រើនគ្រឿងដែលត្រូវបានកម្ទេចនៅតាមដងផ្លូវ។
ក្នុងគ្រាដែលមានប្រជាជនខ្លះបន្តរត់ចោលស្រុកកំណើត ពលរដ្ឋជាច្រើនរបស់ អ៊ុយក្រែន បានស្ម័គ្រចិត្ត នាំគ្នាជីកលេណដ្ឋាន ច្នៃអាវុធដំឡើងមូលដ្ឋានទ័ព ដើម្បីការពារខ្លួន និងវាយប្រហារលើសត្រូវឈ្លានពាន ខណៈប្រជាជនទន់ខ្សោយ រួមមានដូចជា ចាស់ជរា ស្ត្រី និងកុមារជាដើម នាំគ្នាចូលជ្រកក្នុងទីសុវត្ថិភាព។
