សារព័ត៌មាន Reuters ដកស្រង់សម្ដីប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី (វ៉ូឡូឌីម៉ាយឺ ហ្សេឡេនស្កាយ) កាលពីថ្ងៃទី ២៧ កុម្ភៈ អះអាងថា លោកត្រូវការប្រើប្រាប់គ្រប់មធ្យោបាយ និងឱកាស ដើម្បីធានាសន្តិភាពសម្រាប់ប្រទេសរបស់លោក។
ប្រកាសរបស់ប្រធានាធិបតីអ៊ុយក្រែន ត្រូវបានលើកឡើងនៅក្នុងគ្រាដែលប្រតិភូអ៊ុយក្រែន គ្រោងនឹងជួបពិភាក្សាជាមួយ ប្រតិភូរុស្ស៊ី ដើម្បីធ្វើការចរចារកដំណោះស្រាយសម្រាប់សង្គ្រាមនៅ អ៊ុយក្រែន។
ក្នុងថ្ងៃទី ២៧ កុម្ភៈដដែល ការិយាល័យប្រធានាធិបតីអ៊ុយក្រែន បានទទួលស្គាល់ថា ទីក្រុងកៀវ និង មូស្គូ នឹងធ្វើការចរចា «ដោយគ្មានលក្ខខណ្ឌ» នៅ ប្រទេសបេឡារូស។ សារព័ត៌មានអ៊ុយក្រែន រាយការណ៍ថា ប្រតិភូរបស់ អ៊ុយក្រែន នឹងដឹកនាំដោយអនុរដ្ឋមន្ត្រីការបរទេស Mykola Tochytskyi។
ចំណែកភាគីរុស្ស៊ី វិញ មុននោះបានបញ្ជាក់ថា អ៊ុយក្រែន បានយល់ព្រមចរចានៅតំបន់ព្រំដែនជាប់ជាមួយ បេឡារូស។