ប្រធានាធិបតីអ៊ុយក្រែន លោក ហ្សេឡែនស្គី (Zelensky) និងសមភាគីរុស្ស៊ី លោក ពូទីន ត្រូវបានគេជឿ កំពុងជជែកគ្នាអំពីទីតាំង និងពេលវេលាសម្រាប់បើកកិច្ចចរចា ក្នុងបំណងដោះស្រាយវិបត្តិបច្ចុប្បន្ន។
ក៏ប៉ុន្តែ ទន្ទឹមនឹងការជជែកខាងលើ កងទ័ពភាគីទាំងពីរ នៅតែប្រយុទ្ធគ្នាក្នុងសមរភូមិ ហើយ រុស្ស៊ី អាចនឹងចូលកាន់កាប់ រដ្ឋធានីកៀវ របស់ អ៊ុយក្រែន នៅថ្ងៃនេះ។ នេះបើតាមការព្រមានរបស់មេដឹកនាំនៃ ប្រទេសអ៊ុយក្រែន។ យ៉ាងនេះក្ដី លោក ហ្សេឡែនស្គី បញ្ជាក់ថា អ៊ុយក្រែន ជិតទទួលបានជំនួយពីបរទេស ក្នុងនោះមាន សហរដ្ឋអាម៉េរិក ជាដើម។
នៅឯសមរភូមិ កងទ័ពអ៊ុយក្រែន បានកម្ទេចស្ពានចំនួន ២ កន្លែង ដែលជាផ្លូវចូលមកកាន់រដ្ឋធានី ដែលនេះទំនងជាយុទ្ធសាស្ត្រថ្មី ជួយឱ្យ អ៊ុយក្រែន អាចការពាររដ្ឋធានី ពីការលុកលុយរបស់ រុស្ស៊ី។ ទីប្រសព្វគ្នាចំនួន ២ របស់វិថី នៅជាយភាគខាងជើង និងខាងលិចរបស់រដ្ឋធានី ត្រូវបានបំផ្លាញ ដើម្បីបង្អាក់ដំណើរសម្រុកចូលរបស់ កងកម្លាំងរុស្ស៊ី។ នេះបើតាមសេចក្ដីរាយការណ៍របស់សារព័ត៌មានអាម៉េរិក New York Times។
