លោក Zelensky ព្រមានថា រុស្ស៊ី នឹងប្រើប្រាស់កម្លាំងសរុបនៅក្នុងយប់នេះ និងអំពាវនាវឱ្យមានតស៊ូប្រកបដោយភាពរឹងមាំ។
«យប់នេះនឹងជាយប់លំបាកបំផុត។ សត្រូវនឹងប្រើប្រាស់កម្លាំងសរុប។ យើងត្រូវតែឈរឱ្យនឹង។ យប់នេះនឹងមានការលំបាកខ្លាំង ប៉ុន្តែ អរុណរះនឹងមកដល់» ប្រធានាធិបតីអ៊ុយក្រែន លោក Volodymyr Zelensky ថ្លែងកាលពីព្រលប់ថ្ងៃទី ២៥ កុម្ភៈ ពី រដ្ឋធានីកៀវ។
លោក Zelensky ឱ្យដឹងថា ទីក្រុងជាច្រើនរបស់ អ៊ុយក្រែន កំពុងរងការវាយប្រហារ ដូចជា Chernihiv, Sumy, Kharkov ហើយលោកក៏បានអំពាវនាវឱ្យមានការយកចិត្តទុកដាក់ជាពិសេសទៅលើ ទីក្រុងកៀវ។ លោកថា កងទ័ពរុស្ស៊ី កំពុងសម្រុកចូលកៀករដ្ឋធានី ពីទិសខាងជើង និងខាងកើត។
លោក Zelensky ក៏ឱ្យដឹងដែរថា លោកបានពិភាក្សាជាមួយមេដឹកនាំប្រទេសមួយចំនួន ដូចជា អាម៉េរិក, អាល្លឺម៉ង់, បារាំង, ហូឡង់ ជាដើម និងបានមូលមតិគ្នាថា អ៊ុយក្រែន នឹងទទួលបាន «ជំនួយច្រើនជាងមុន»។
«ខ្ញុំសូមអរគុណដល់មេដឹកនាំនានា ពិសេសគឺ ប្រធានាធិបតីអាម៉េរិក បៃដិន» ប្រធានាធិបតីអ៊ុយក្រែន ថ្លែងដូច្នេះ។
ប្រធានាធិបតីរុស្ស៊ី ពូទីន កាលពីថ្ងៃទី ២៤ កុម្ភៈ បានបើកយុទ្ធនាការយោធាពិសេសនៅ អ៊ុយក្រែន ដើម្បី «បំបាត់ការពង្រីកកម្លាំងយោធានៅ អ៊ុយក្រែន» ព្រោះតែមានអារម្មណ៍ថា មិនមានសុវត្ថិភាពនៅចំពោះមុខ «ការគំរាមកំហែងជាប្រចាំ ពី សំណាក់ អ៊ុយក្រែន»។
ក្រោយការប្រកាសឈ្លានពានលើ អ៊ុយក្រែន លោក ពូទីន និង ប្រទេសរុស្ស៊ី ក៏ចាប់ផ្ដើមទទួលរងការដាក់ទណ្ឌកម្មពីលោកខាងលិច ក៏ដូចជាមហាអំណាយមួយចំនួនក្នុងពិភពលោក។