ករណីផ្ទុះមួយបានលាន់ឡើងនៅក្នុង រដ្ឋធានីកៀវ ប្រទេសអ៊ុយក្រែន នៅវេលាថ្ងៃត្រង់ (ម៉ោង ១៧ ល្ងាច នៅ ភ្នំពេញ) នេះបើតាម Reuters។
មុននោះក៏មានករណីផ្ទុះអាវុធជាច្រើនលើកផងដែរនៅរដ្ឋធានីរបស់ អ៊ុយក្រែន។ ក្រុមមន្ត្រីនៃក្រសួងមហាផ្ទៃអ៊ុយក្រែន បានឱ្យដឹងថា ទីបញ្ជាការយោធានៅទីក្រុងមួយចំនួន រួមទាំង កៀវ ក៏ត្រូវរងការវាយប្រហារដោយរ៉ុក្កែត។
ប្រធានាធិបតីអ៊ុយក្រែន មុននេះ បានអំពាវនាវឱ្យប្រជាជនទូទាំងប្រទេស សាមគ្គីគ្នាជាធ្លុងមួយ ដើម្បីការពារទឹកដី។ លោក Zelensky ថ្លែងថា អាជ្ញាធរអ៊ុយក្រែន នឹងផ្ដល់អាវុធដល់ប្រជាពលរដ្ឋគ្រប់រូប ដែលមានបំណងចូលការពារទឹកដី។
ទន្ទឹមនឹងនេះ ប្រធានាធិបតីអ៊ុយក្រែន ក៏បានអំពាវនាវដល់ប្រជាជននៅ ប្រទេសរុស្ស៊ី ឱ្យចេញធ្វើបាតុកម្មប្រឆាំងនឹងសង្គ្រាមផងដែរ។
