ក្រុមមន្ត្រីសហរដ្ឋអាម៉េរិក កំពុងតែពិភាក្សាគ្នាអំពីគម្រោងជម្លៀស ប្រធានាធិបតីអ៊ុយក្រែន លោក វ៉ូឡូឌីម៉ាយឺ ហ្សេឡេនស្កាយ (Volodymyr Zelensky) ចេញពី រដ្ឋធានីកៀវ ក្នុងករណីកើតមានសង្គ្រាមជាមួយ រុស្ស៊ី។
យោងតាម Sputnik ព័ត៌មានលម្អិតស្ដីពីគម្រោងជម្លៀសខាងលើ ដូចជា ពេលវេលា និងក្នុងស្ថានការណ៍បែបណា មិនទាន់ត្រូវបានគេឱ្យដឹងនៅឡើយ។ រដ្ឋធានីកៀវ គឺជាទីក្រុងធំទីមួយរបស់ អ៊ុយក្រែន និងមានប្រជាជនសរុបជិត ៣ លាននាក់។ ទីក្រុងនេះស្ថិតនៅក្បែរទន្លេ និងមានចម្ងាយជិត ៣៨០ គីឡូម៉ែត្រ ពី ព្រំដែនរុស្ស៊ី។
ព័ត៌មានស្ដីពីគម្រោងជម្លៀស ប្រធានាធិបតីអ៊ុយក្រែន ត្រូវបានបង្ហើបឱ្យដឹងបន្ទាប់ពី ដែនដី Donetsk និង Luhansk នៅភាគខាងកើត នៃ ប្រទេសអ៊ុយក្រែន ត្រូវបាន ប្រធានាធិបតីរុស្ស៊ី លោក ពូទីន ទទួលស្គាល់ថា ជាប្រទេសឯករាជ្យ ព្រមទាំងបានបញ្ជាឱ្យបញ្ជូនទ័ពទៅកាន់តំបន់ទាំងនោះ។
ទង្វើរបស់លោក ពូទីន បានធ្វើឱ្យស្ថានការណ៍តានតឹងរវាង រុស្ស៊ី ជាមួយនឹង អ៊ុយក្រែន អាម៉េរិក រួមនឹងបណ្ដាប្រទេសនៃ សម្ព័ន្ធមិត្តអាត្លង់ទិកខាងជើង (ណាតូ) កាន់តែឡើងកម្ដៅ។
ស្ថានការណ៍នៅ អ៊ុយក្រែន បានឡើងកម្ដៅខ្លាំងចាប់តាំងពីចុងឆ្នាំ ២០២១ បន្ទាប់ពី សហរដ្ឋអាម៉េរិក និងលោកខាងលិច បានចោទថា រុស្ស៊ី ពង្រាយទ័ពជាង ១០០,០០០ នាក់ នៅព្រំដែនភាគខាងលិច ដើម្បីអនុវត្តផែនការឈ្លានពាន ប្រទេសអ៊ុយក្រែន។ ប៉ុន្តែ រុស្ស៊ី បានបដិសេធការចោទប្រកាន់នេះ និងបានរិះគន់ថា សហរដ្ឋអាម៉េរិក និងសម្ព័ន្ធមិត្ត បំប៉ោងហានិភ័យស្ដីពីការកើតមានសង្គ្រាម៕