សហរដ្ឋអាម៉េរិក នឹងដាក់ទណ្ឌកម្មថ្មីនានាទៅលើ ប្រទេសរុស្ស៊ី បន្ទាប់ពី ទីក្រុងមូស្គូ ទទួលស្គាល់តំបន់ផ្ដាច់ខ្លួន Donetsk និង Luhansk នៅ ភាគខាងកើតនៃ ប្រទេសអ៊ុយក្រែន ជាប្រទេសឯករាជ្យ។
«យើងមានគម្រោងប្រកាសដាក់ទណ្ឌកម្មថ្មីលើ ប្រទេសរុស្ស៊ី នៅថ្ងៃស្អែក ដើម្បីឆ្លើយតបនឹងការសម្រេច និងសកម្មភាពរបស់ ទីក្រុងមូស្គូ កាលពីម្សិលមិញ។ យើងកំពុងសហការជាមួយសម្ព័ន្ធមិត្ត និងដៃគូ ទាក់ទិននឹងការប្រកាសនោះ» លេខាសារព័ត៌មានរបស់ សេតវិមាន Jen Psaki បានឱ្យដឹងដូច្នេះកាលពីយប់ថ្ងៃទី ២១ កុម្ភៈ (ព្រឹកថ្ងៃទី ២២ កុម្ភៈ ម៉ោងនៅ កម្ពុជា)។
Psaki មុននោះបានឱ្យដឹងថា ប្រធានាធិបតី ចូ បៃដិន នឹងប្រកាសបទបញ្ជា «ហាមការធ្វើវិនិយោគ ពាណិជ្ជកម្ម និងហិរញ្ញវត្ថុរបស់ ពលរដ្ឋអាម៉េរិក ទាក់ទងនឹងដែនដីដែលគេហៅថា សាធារណរដ្ឋប្រជាមានិត Donetsk (DPR) និង សាធារណរដ្ឋប្រជាមានិត Luhansk (LNR) នៅ អ៊ុយក្រែន»។
បទបញ្ជាខាងលើនឹង «ផ្ដល់សិទ្ធិឱ្យមានការដាក់ទណ្ឌកម្មលើបុគ្គលគ្រប់រូបដែលត្រូវបានរកឃើញថា ធ្វើសកម្មភាពនៅក្នុងបណ្ដាតំបន់ទាំងនោះរបស់ អ៊ុយក្រែន» Psaki ឱ្យដឹងដូច្នេះ និងបន្ថែមថា វាជាទណ្ឌកម្មដោយឡែក ក្រៅពីទណ្ឌកម្មទ្រង់ទ្រាយធំដែលលោកខាងលិចនឹងអនុវត្ត បើសិន រុស្ស៊ី ឈ្លានពាន អ៊ុយក្រែន។
ប្រកាសខាងលើនេះត្រូវបានលើកឡើងបន្ទាប់ពី ប្រធានាធិបតីរុស្ស៊ី លោក វ្លាឌីមៀ ពូទីន កាលពីថ្ងៃទី ២១ កុម្ភៈ បានប្រកាសទទួលស្គាល់ឯករាជ្យរបស់តំបន់ Donetsk និង Luhansk ដែលបានផ្ដាច់ខ្លួនចេញពី ប្រទេសអ៊ុយក្រែន និងបានចុះកិច្ចព្រមព្រៀងសហការគ្នាជាមួយមេដឹកនាំរបស់តំបន់ទាំងពីរនេះ។ កិច្ចព្រមព្រៀងនេះ អនុញ្ញាតឱ្យ រុស្ស៊ី មានសិទ្ធិកសាងមូលដ្ឋានទ័ពនៅ Donetsk និង Luhansk។ លោក ពូទីន ក៏បានបញ្ជាឱ្យក្រសួងការពារជាតិ បញ្ជូនទ័ពទៅតំបន់ទាំងនេះផងដែរ៕