មេដឹកនាំ WHO បានឱ្យដឹងថា ដំណាក់កាលធ្ងន់ធ្ងររបស់ជំងឺរាតត្បាតសកល កូវីដ-១៩ អាចបញ្ចប់នៅក្នុងឆ្នាំ ២០២២ នេះ បើសិនប្រជាជនប្រមាណ ៧០% របស់ពិភពលោក បានទទួលការចាក់វ៉ាក់សាំង។
«យើងរំពឹងថា ដំណាក់កាលស្រួចស្រាវរបស់ជំងឺរាតត្បាតសកលនឹងបញ្ចប់ក្នុងឆ្នាំនេះ ជាមួយនឹងលក្ខខណ្ឌ ត្រូវសម្រេចដល់គោលដៅចាក់វ៉ាក់សាំងឱ្យបាន ៧០% នៃចំនួនប្រជាជនសរុប នៅពាក់កណ្ដាលឆ្នាំនេះ ខ្ទង់ខែមិថុនា-កក្កដា» លោក Tedros Adhanom Ghebreyesus ប្រធានអង្គការសុខភាពពិភពលោក ថ្លែងដូច្នេះកាលពីថ្ងៃទី ១១ កុម្ភៈ ពេលកំពុងធ្វើទស្សនកិច្ចក្រុមហ៊ុន Afrigen Biologics&Vaccines នៅ អាហ្វ្រិកខាងត្បូង។
លោក Tedros បន្ថែមថា៖ «បើសិនប្រការនោះត្រូវបានអនុវត្ត ដំណាក់កាលស្រួចស្រាវរបស់ជំងឺរាតត្បាតសកល ពិតជាអាចត្រូវបានបញ្ចប់ ហើយនោះគឺជាការដែលយើងរំពឹងទុក។ វាស្ថិតក្នុងដៃរបស់យើងគ្រប់គ្នា វាមិនមែនជារឿងសំណាងល្អ ឬសំណាងអាក្រក់ ប៉ុន្តែ វាគឺជាបញ្ហានៃការជ្រើសរើស»។
Afrigen គឺជាក្រុមហ៊ុនដំបូងគេនៅ ទ្វីបអាហ្វ្រិក ដែលផលិតវ៉ាក់សាំងបង្ការជំងឺកូវីដ-១៩ ដោយប្រើប្រាស់បច្ចេកវិទ្យា mRNA របស់ Moderna។ ផលិតផលនេះនឹងត្រូវពិសោធលើមនុស្សនៅខែវិច្ឆិកា ២០២២ និងអនុម័តនៅឆ្នាំ ២០២៤។
ប្រធាន WHO រំពឹងថា វ៉ាក់សាំងនេះ «សមស្របជាមួយនឹងស្ថានការណ៍ដែលវាត្រូវបានប្រើប្រាស់ដោយមានឧបសគ្គតិចតួចទាក់ទងនឹងការទុកដាក់ ហើយតម្លៃក៏ទាបជាងទីផ្សារ»។
Afrigen កំពុងតែនាំមុខគេនៅក្នុងគម្រោងពិសោធដែលផ្ដល់ជំនួយដោយ WHO និង COVAX។ មជ្ឈមណ្ឌលផ្ទេរបច្ចេកវិទ្យាដែលត្រូវបានបង្កើតឡើងកាលពីឆ្នាំ ២០២១ នឹងបណ្ដុះបណ្ដាលប្រទេសមួយចំនួន ហើយផ្ទេរបច្ចេកវិទ្យាផលិតវ៉ាក់សាំងបង្ការជំងឺកូវីដ-១៩ ឱ្យទៅបណ្ដាប្រទេសក្រីក្រដែលស្ថិតនៅក្រោយគេក្នុងការប្រកួតប្រជែងចាក់វ៉ាក់សាំង៕