(មីយ៉ានម៉ា)-ហេតុការណ៍បាក់ដីដែលកើតឡើងនៅឯអណ្ដូងរ៉ែត្បូងមួយក្នុងរដ្ឋ Kachin ប្រទេសមីយ៉ានម៉ា (ភូមា) នៅថ្ងៃនេះ បណ្ដាលឱ្យមនុស្សម្នាក់ស្លាប់ និងប្រមាណពី ៧០ ទៅ ១០០ នាក់ កំពុងបាត់ខ្លួន។
«ពួកគេបានបាត់ខ្លួននៅក្នុងហេតុការណ៍បាក់ស្រុតដីកាលពីវេលាម៉ោង ៤ ទៀបភ្លឺថ្ងៃនេះ នៅឯអណ្ដូងរ៉ែត្បូង Hpakant ក្នុងរដ្ឋ Kachin» សមាជិកម្នាក់របស់ក្រុមសង្គ្រោះបន្ទាន់ Ko Ny បានបញ្ជាក់ដូច្នេះ។
Dashi Naw Lawn ដែលជាសមាជិកម្នាក់នៃអង្គការសង្គមស៊ីវិលក្នុងតំបន់ បានឱ្យដឹងថា ក្រុមមន្ត្រីបានមកដល់កន្លែងកើតហេតុនៅវេលាម៉ោងប្រហែល ៧ ព្រឹក និងកំពុងស្វែងរក ជួយសង្គ្រោះ។ ជនរងគ្រោះ ២៥ នាក់ ដែលរងរបួស ត្រូវបានបញ្ជូនទៅកាន់មន្ទីរពេទ្យ។
បុគ្គលិកសង្គ្រោះបន្ទាន់ប្រមាណ ២០០ នាក់ ត្រូវបានបញ្ជូនទៅកាន់អណ្ដូងរ៉ែត្បូងខាងលើ។ កងកម្លាំងនេះក៏បានប្រើប្រាស់ទូកដើម្បីស្វែងរកអ្នកដែលបានស្លាប់នៅក្នុងបឹងក្បែរអណ្ដូងរ៉ែត្បូងនេះផងដែរ។
ប្រទេសមីយ៉ានម៉ា ផលិតត្បូង Jade (អម្បូរត្បូងកណ្តៀង) ប្រហែល ៩០% ធៀបនឹងបរិមាណសរុបនៅទូទាំងពិភពលោក។ អង្គការ Global Witness បានគណនាឃើញថា វិស័យឧស្សាហកម្មនេះមានតម្លៃប្រមាណ ៣១ ពាន់លានដុល្លារក្នុងឆ្នាំ ២០១៤៕