Jude Walker អាយុ 11 ឆ្នាំ បានធ្វើដំណើរដោយថ្មើរជើងក្នុងចម្ងាយផ្លូវជាង 330 គីឡូម៉ែត្រ ពីភាគខាងជើងប្រទេសអង់គ្លេស ទៅកាន់ទីក្រុងឡុងដ៍ ដើម្បីអំពាវនាវឱ្យមានការគាំទ្រដល់ការយកពន្ធការបំភាយឧស្ម័នកាបូន។
ក្រោយទទួលបានការលើកទឹកចិត្តពីសកម្មជនបរិស្ថានម្នាក់ឈ្មោះ Greta Thunberg កុមារា Walker មកពីតំបន់ Hebden Bridge នៃស្រុក Yorkshire បានបង្ហាញភាពក្លាហានរបស់ខ្លួន តាមរយៈការធ្វើដំណើរថ្មើរជើង ក្នុងចម្ងាយផ្លូវជាង 330 គីឡូម៉ែត្រ ឆ្លងកាត់ភ្នំតូច ភ្នំធំ ឆ្លងវាល កាត់ព្រៃ ក្រោមកំដៅថ្ងៃ ភ្លៀង ខ្យល់ ដើម្បីសម្រេចគោលដៅដ៏អស្ចារ្យ នោះគឺការឆ្ពោះទៅកាន់វិមានសភាអង់គ្លេស ដែលស្ថិតនៅក្នុងតំបន់ Westminster នៃទីក្រុងឡុងដ៍។ នេះបើតាមការចុះផ្សាយរបស់សារព័ត៌មាន Reuters។
![](https://i0.wp.com/www.lareine.com.kh/wp-content/uploads/2021/08/lareine.com.kh-2021-08-13_17-30-41_438085.jpg?resize=696%2C428&ssl=1)
កុមាររូបនេះ យល់ថា ការយកពន្ធលើសកម្មភាពបំភាយឧស្ម័នកាបូន គឺជាជំហានសំខាន់ដើម្បីទប់ស្កាត់ដំណើរការរុញច្រានមនុស្សលោក ធ្លាក់ទៅក្នុងស្ថានភាពដែលកុមារនេះហៅថា «ផុតពូជ»។
![](https://i0.wp.com/www.lareine.com.kh/wp-content/uploads/2021/08/lareine.com.kh-2021-08-13_17-38-29_448899.jpg?resize=696%2C522&ssl=1)
«ពេលនេះ យើងគ្រប់គ្នាបានដឹងច្រើនអំពីការប្រែប្រួលអាកាសធាតុ ហើយខ្ញុំគិតថា ពន្ធលើកាបូន ប្រាកដជាវិធីមួយក្នុងចំណោមដំណោះស្រាយដ៏មានប្រយោជន៍បំផុតសម្រាប់បញ្ហានេះ» កុមារ Walker និយាយនៅពេលដើរកាត់ទីរួមស្រុក Woburn Sands ដែលមានចម្ងាយប្រហែល 80 គីឡូម៉ែត្រពីក្រុងឡុងដ៍។
![](https://i0.wp.com/www.lareine.com.kh/wp-content/uploads/2021/08/lareine.com.kh-2021-08-13_17-36-19_350619.jpg?resize=696%2C360&ssl=1)
Walker សង្ឃឹមថា ដំណើរយាត្រារបស់ខ្លួននឹងទាក់ទាញការគាំទ្រពីគ្រប់គ្នា ហើយចុះហត្ថលេខាលើញត្តិមួយដែលស្នើឱ្យមានការយកពន្ធលើការបំភាយឧស្ម័នកាបូន។ ញត្តិរបស់កុមារនេះ ទទួលបានហត្ថលេខាចំនួន 57,000 នាក់រួចហើយ។ នៅពេលញត្តិនេះ មានហត្ថលេខាគ្រប់ 100,000 នាក់ នោះវានឹងត្រូវបានយកទៅពិនិត្យ ដើម្បីលើកជារបៀបវារៈ ក្នុងកិច្ចប្រជុំនៅសភាអង់គ្លេស។
![](https://i0.wp.com/www.lareine.com.kh/wp-content/uploads/2021/08/lareine.com.kh-2021-08-13_17-29-26_827093.jpg?resize=696%2C395&ssl=1)
Walker បានឱ្យដឹងថា៖ «ឥទ្ធិពលនៃការប្រែប្រួលអាកាសធាតុ បានបង្ហាញខ្លួនហើយ។ យើងពិតជាត្រូវការផ្លាស់ប្ដូរនៅពេលនេះ បើសិនជាចង់ចៀសវាងលទ្ធផលមហាសែនអាក្រក់នាពេលខាងមុខ»។
![](https://i0.wp.com/www.lareine.com.kh/wp-content/uploads/2021/08/lareine.com.kh-2021-08-13_17-30-13_788624.jpg?resize=696%2C418&ssl=1)
Walker ដើរដោយថ្មើរជើងប្រហែល 16 គីឡូម៉ែត្រ ក្នុង 1 ថ្ងៃ ជាមួយនឹងសមាជិកគ្រួសារ និងមិត្តភក្ដិ។ Walker នឹងបញ្ចប់ដំណើរយាត្រារយៈចម្ងាយជាង 330 គីឡូម៉ែត្រ របស់ខ្លួន នៅឯឧទ្យាន St James ក្នុងថ្ងៃទី 14 សីហា 2021៕