លែងឆ្ងល់! ភាពខុសគ្នារវាងគ្រុនផ្ដាសាយធម្មតា និងគ្រុនផ្ដាសាយធំ…

ទាំងអស់គ្នាប្រហែលជាធ្លាប់កើតជំងឺគ្រុនផ្ដាសាយមកខ្លះៗហើយ តែក៏មិនមែនគ្រប់គ្នាសុទ្ធតែធ្លាប់កើតជំងឺផ្ដាសាយធំដែរ ព្រោះជំងឺគ្រុនផ្ដាសាយធំមានគ្រោះថ្នាក់ជាងជំងឺគ្រុនផ្ដាសាយធម្មតាច្រើនណាស់។ ក្រៅពីអាការជំងឺនឹងធ្ងន់ធ្ងរជាង ក្រជាជាងហើយ នៅមានគ្រុនផ្ដាសាយអម្បូរថ្មីៗដែលអាចសម្លាប់ជីវិតមនុស្សបានគ្រប់ពេលទៀតផង ដូច្នេះសួរថា តើពេលណាដែលយើងអាចដឹងថា គ្រុនផ្ដាសាយដែលយើងកំពុងកើតនេះ ជាគ្រុនផ្ដាសាយធម្មតា ឬគ្រុនផ្ដាសាយធំ? តើនៅពេលណាដែលយើងអាចទិញថ្នាំមកលេបដោយខ្លួនឯងបាន? ឬពេលណាដែលយើងត្រូវតែទៅជួបគ្រូពេទ្យ?

ឡារ៉ែនមានវិធីសង្កេតងាយៗមកជម្រាបជូន…

1 . អាការគ្រុន

គ្រុនផ្ដាសាយធម្មតា – ក្ដៅខ្លួនស្ទិញៗ លេបថ្នាំបំបាត់គ្រុន 1-2ថ្ងៃនឹងបាត់ទៅវិញ និងមិនលាប់ឡើងវិញទេ។

គ្រុនផ្ដាសាយធំ – ក្ដៅខ្លួនខ្លាំង និងយូរដល់ទៅជាង 3-4ថ្ងៃឡើងទៅ។ កម្ដៅនឹងស្រកចុះតែនៅពេលលេបថ្នាំប៉ុណ្ណោះ។

2 . ឈឺក្បាល

គ្រុនផ្ដាសាយធម្មតា – អាចឈឺក្បាលតែបន្តិចបន្តួច ឬអាចគ្មានអាការឈឺក្បាលតែម្ដង។

គ្រុនផ្ដាសាយធំ – អាចឈឺក្បាលខ្លាំងជាងប្រក្រតី។

3 . ឈឺចុកចាប់តាមរាងកាយ

គ្រុនផ្ដាសាយធម្មតា – មានអាការឈឺចុកចាប់តាមរាងកាយត្រឹមតែបន្តិចបន្តួចប៉ុណ្ណោះ។

គ្រុនផ្ដាសាយធំ – ឈឺចុកចាប់តាមរាងកាយខ្លាំងណាស់។

4 . នឿយល្វើយ

គ្រុនផ្ដាសាយធម្មតា – មានអាការនឿយល្វើយបន្តិចបន្តួច និងមិនយូរឡើយ ត្រឹមតែ 1-2ថ្ងៃប៉ុណ្ណោះ។

គ្រុនផ្ដាសាយធំ – នឿយល្វើយខ្លាំង អាចកើតអាការនេះយូររាប់សប្ដាហ៍ក៏មាន។

5 . អាការក្អក

គ្រុនផ្ដាសាយធម្មតា – មិនក្អកច្រើនទេ ក្អកស្ងួតៗ។

គ្រុនផ្ដាសាយធំ – ក្អកខ្លាំង ក្អកញឹកញាប់ និងមានស្លេស្ម៍ខាប់ស្អិត។

6 . សំបោរ

គ្រុនផ្ដាសាយធម្មតា – ទឹកសំបោរថ្លាៗ រាវ ឬអាចគ្មានសំបោរសោះក៏មាន។

គ្រុនផ្ដាសាយធំ – ទឹកសំបោរខាប់ ស្អិត។

7 . ឈឺ-ក

គ្រុនផ្ដាសាយធម្មតា – ឃើញមានអាការឈឺ-កញឹកញាប់ក្នុងអំឡុងពេលគ្រុនដំបូងៗ។

គ្រុនផ្ដាសាយធំ – អាចមិនឃើញមានអាការឈឺ-ក ឬឃើញមានតិចតួចបំផុត។

8 . ជំងឺជ្រៀតជ្រែក

គ្រុនផ្ដាសាយធម្មតា – សៃណឹស ឬអំបៅអំបែក។

គ្រុនផ្ដាសាយធំ – រលាកបំពង់ដង្ហើម ឬហើមសួត។

9 . ការរក្សាព្យាបាល

គ្រុនផ្ដាសាយធម្មតា – គ្មានថ្នាំព្យាបាលដោយត្រង់នោះទេ អាចធ្វើបានត្រឹមតែលេបថ្នាំព្យាបាលតាមអាការប៉ុណ្ណោះ។

គ្រុនផ្ដាសាយធំ – ព្យាបាលដោយថ្នាំពេទ្យ ឬទៅជួបគ្រូពេទ្យពេលដឹងខ្លួនថា កើតជំងឺគ្រុនផ្ដាសាយធំ។

10 . ការបង្ការជំងឺ

គ្រុនផ្ដាសាយធម្មតា – គ្មានវិធីបង្ការដោយត្រង់ទេ។

គ្រុនផ្ដាសាយធំ – ចាក់វ៉ាក់សាំងការពារជំងឺគ្រុនផ្ដាសាយធំ។

តែយ៉ាងណាក៏ដោយ វិធីចៀសវាងពីអាការគ្រុនផ្ដាសាយ មិនថាប្រភេទណាក៏ដោយ គឺថែរក្សាសុខភាពរាងកាយឱ្យរឹងប៉ឹងមាំមួនជាប់ជានិច្ច ញ៉ាំអាហារដែលមានប្រយោជន៍(ជាពិសេសអាហារដែលមានវីតាមីន C ខ្ពស់) ហាត់ប្រាណឱ្យបានជាប់លាប់ និងសម្រាកឱ្យបានគ្រប់គ្រាន់…តែប៉ុណ្ណឹង ជីវិតក៏នឹងឃ្លាតឆ្ងាយពីជំងឺគ្រុនផ្ដាសាយបានដោយងាយ៕