ប្រធានអង្គការមូលនិធិរូបិយវត្ថុអន្ដរជាតិ IMF (International Monetary Fund) អ្នកស្រី Kristalina Georgieva បានព្រមានថា សេដ្ឋកិច្ចទូទាំងពិភពលោកសម្រាប់ឆ្នាំ2020 នឹងខាតបង់ច្រើនដោយសារអាសន្នរោគកូរ៉ូណា COVID-19 ប៉ុន្តែថា វានឹងងើបឡើងវិញបានឆាប់រហ័ស។
ថ្លែងក្នុងវេទិកាស្ត្រីសកលដែលបានធ្វើឡើងនៅទីក្រុង Dubai (អារ៉ាប់រួម) កាលពីថ្ងៃទី16កុម្ភៈ ប្រធានអង្គការមូលនិធិរូបិយវត្ថុអន្តរជាតិ IMF អ្នកស្រី Kristalina Georgieva យល់ថា វាមិនទាន់ដល់ពេលដើម្បីធ្វើការវាយតម្លៃគ្រប់ជ្រុងជ្រោយទៅលើឥទ្ធិពលនៃអាសន្នរោគកូរ៉ូណា COVID-19។
AFP ដកស្រង់សម្ដីប្រធានអង្គការនេះ បកស្រាយថា ព័ត៌មានអំពីអាសន្នរោគកូរ៉ូណា នៅតែមិនទាន់ត្រូវបានស្វែងយល់លម្អិតនៅឡើយ ហើយបច្ចុប្បន្ន គេក៏នៅមិនទាន់ដឹងថា ប្រទេសចិននឹងអាចទប់ទល់មេរោគនេះបានដល់ពេលណា ឬក៏មេរោគនេះអាចរាលដាលទូទាំងពិភពលោក?
ប៉ុន្តែ អ្នកស្រី Georgieva ទទួលស្គាល់ថា អាសន្នរោគនេះ បានបង្ករផលប៉ះពាល់ខ្លាំងដល់វិស័យមួយចំនួន ដូចជាវិស័យទេសចរណ៍ និងដឹកជញ្ជូនជាដើម។ “អាចថា (កំណើនសេដ្ឋកិច្ចទូទាំងពិភពលោក) នឹងទទួលរងការខូចខាត ហើយយើងសង្ឃឹមថា កម្រិតនៃការខូចខាតនឹងមានប្រហែលពី 0,1-0,2%”។ អ្នកស្រី Georgieva ថ្លែងដូច្នេះ។
កត្តាមួយដែលត្រូវបានគេយកមកប្រៀបធៀបអំពីកម្រិតនៃផលប៉ះពាល់របស់អាសន្នរោគ COVID-19 នោះគឺទំហំសេដ្ឋកិច្ចរបស់ប្រទេសចិន។ ឆ្នាំ2002 ដល់ឆ្នាំ2003 ប្រទេសចិនកាន់កាប់8%នៃទំហំសេដ្ឋកិច្ចទូទាំងពិភពលោក នាសម័យអាសន្នរោគ SARS ប៉ុន្តែបច្ចុប្បន្ន ចំនួននេះ បានកើនឡើងដល់19%។
អ្នកស្រី Georgieva ថ្លែងថា សេដ្ឋកិច្ចពិភពលោក អាចនឹងមានឱនភាពខ្លាំងក្នុងមួយរយៈពេលខ្លីដោយសារអាសន្នរោគកូរ៉ូណា ហើយក្រោយវិបត្តិសុខភាពនេះ សេដ្ឋកិច្ចនឹងងើបឡើងបានឆាប់រហ័ស។
សូមរំឭកថា មុននេះ ក្នុងរបាយការណ៍មួយស្ដីអំពីការរំពឹងទុកនៃសេដ្ឋកិច្ចពិភពលោក ដែលត្រូវបានប្រកាសកាលពីខែមករា មូលនិធី IMF បានទម្លាក់ពិន្ទុនៃកំណើនសេដ្ឋកិច្ចទូទាំងពិភពលោកសម្រាប់ឆ្នាំ2020 មកនូវត្រឹម3,3% ថយចុះ0,1% បើធៀបនឹងការប៉ានស្មានមុននេះ។ កំណើនសេដ្ឋកិច្ចក្នុងឆ្នាំ2019 ត្រឹមតែ2,9% ពោលគឺទាបបំផុតក្នុងអំឡុង1ទសវត្សរ៍កន្លង៕
ប្រភព៖ សារព័ត៌មានបរទេស
