ទីប្រឹក្សាផ្នែកសុខាភិបាលរបស់ប្រធានាធិបតីអាម៉េរិក ព្រមានថា រដូវរងាខាងមុខ អូមីក្រុង មានឱកាសឆ្លងរាលដាលទូទាំងសកលលោក។
«មានប្រការដ៏ច្បាស់លាស់មួយគឺ អូមីក្រុង មានលទ្ធភាពឆ្លងរាលដាលលើសពីធម្មតា» លោក Anthony Fauci ប្រធានវិទ្យាស្ថានជាតិជំងឺឆ្លង និងជាទីប្រឹក្សាផ្នែកសុខាភិបាលរបស់ប្រធានាធិបតីអាម៉េរិក បានប្រាប់ NBC News កាលពីថ្ងៃទី ១៩ ធ្នូ ដូច្នេះ និងបានបន្ថែមថា «វានឹងរាតត្បាតពាសពេញពិភពលោក»។
ចាប់ពីត្រូវបានរកឃើញដំបូងនៅ អាហ្វ្រិកខាងត្បូង កាលពីខែវិច្ឆិកា មកដល់បច្ចុប្បន្ន វីរុសកូវីដ-១៩ ប្រភេទបំប្លែងខ្លួនថ្មី អូមីក្រុង បានឆ្លងរាលដាលដល់ប្រទេសចំនួនរាប់សិបនៅទូទាំងសកលលោក ធ្វើឱ្យមានការព្រួយបារម្ភកាន់តែខ្លាំងចំពោះរលកនៃការរាតត្បាតថ្មី។
បើទោះជាសញ្ញាមួយចំនួនបង្ហាញថា អូមីក្រុង មិនធ្ងន់ធ្ងរជាង ដេលតា (Delta) និងមិនទាន់ក្លាយជា វ៉ារ្យ៉ង់ ដែលឈរលំដាប់លេខ១ ប៉ុន្តែ ទិន្នន័យដំបូងបានបញ្ជាក់ថា វាមានលទ្ធភាពទប់ទល់នឹងវ៉ាក់សាំង និងបង្កការឆ្លងរាលដាលខ្ពស់ជាង។
លោក Fauci ថ្លែងថា៖ «បើសិនជាស្ថានភាពនេះនៅតែបន្តអូសបន្លាយ ក្នុងរយៈពេលពី ១ ទៅ ២ សប្ដាហ៍ទៀត ប្រព័ន្ធសុខាភិបាលរបស់យើងនឹងប្រែជាតានតឹង ពិសេសគឺនៅតំបន់ដែលមានអត្រាចាក់វ៉ាក់សាំងទាប។
បច្ចុប្បន្ន វ៉ារ្យ៉ង់អូមីក្រុង កំពុងរួមចំណែកប្រមាណ ៣% នៃករណីឆ្លង កូវីដ-១៩ នៅ សហរដ្ឋអាម៉េរិក ហើយតួលេខនេះត្រូវបានព្យាករថា នឹងកើនឡើងខ្ពស់ដូចអ្វីដែលបានកើតឡើងនៅក្នុងបណ្ដាដទៃ៕
