លោកតាវ័យ92ឆ្នាំម្នាក់នៅភាគខាងត្បូងប្រទេសវៀតណាម បានធ្វើឱ្យមានចំណាប់អារម្មណ៍យ៉ាងខ្លាំង និងត្រូវបានសារព័ត៌មានអឺរ៉ុបចុះផ្សាយ ដោយសារតែសក់ដ៏វែងអន្លាយ និងជំនឿថាមានវិញ្ញាណតាមថែរក្សាសក់នេះ។
សារព័ត៌មាន Reuters បានចេញផ្សាយថា៖ “COVID-19 បានធ្វើឱ្យមនុស្សទូទាំងពិភពលោក ត្រូវថែរក្សាសក់ឱ្យបានត្រឹមត្រូវ និងមានរបៀប ប៉ុន្តែលោកតាវ័យ92ឆ្នាំ ឈ្មោះ Nguyen Van Chien ឯណេះវិញ បែរជាមិនបានកាត់សក់ទាល់តែសោះក្នុងរយៈពេលជាង80ឆ្នាំមកនេះ”។
លោកតា Chien វ័យ92ឆ្នាំ មានទីលំនៅនៅក្នុងស្រុក Chau Thanh ខេត្ត Tien Giang ភាគខាងត្បូងប្រទេសវៀតណាម គឺជាម្ចាស់សក់ដែលមានប្រវែង5ម៉ែត្រ។ គាត់មានមោទនភាព និងបានហៅសក់នេះថាជារបស់ដែលម្ដាយបានចែកឱ្យ មិនមែនចង់គាត់គឺកាត់នោះទេ។
លោកតាម Chien ថ្លែងថា៖ “ខ្ញុំជឿថា បើសិនជាកាត់សក់នេះ ខ្ញុំប្រាកដជាស្លាប់។ ខ្ញុំមិនហ៊ានផ្លាស់ប្ដូរអ្វីទាំងអស់ សូម្បីតែការសិតសក់”។
ចំពោះការថែរក្សា និងចិញ្ចឹមសក់ លោកតាប្រាប់ថា គាត់តែងបួងវាជាដុំ និងជួតដោយកន្សែងដើម្បីរក្សាសក់ និងក្បាលឱ្យនៅស្ងួត ស្អាតបាត និងល្អមើលបំផុតតាមដែលអាចធ្វើទៅបាន។
លោកតា Chien មានជំនឿទៅលើព្រលឹងខ្មោចបីសាច វិញ្ញាណអាថ៌កំបាំងនានា និងគោរពទេវតា។ ការចិញ្ចឹមសក់ទុកឱ្យវែងបែបនេះ ក៏ជាការបន់ស្រន់សុំសេចក្ដីសុខ និងគោរពចំពោះការប្រទានរបស់ធម្មជាតិ។
កាលពីនៅតូច គាត់តែងត្រូវបានស្នើឱ្យកាត់សក់ឱ្យបានស្អាតបាតនៅពេលទៅសាលារៀន។ ក្រោយពីរៀនចប់ថ្នាក់ទី3 គាត់ក៏បានសម្រេចចិត្តថាលែងកាត់ សិត ឬកក់សក់រហូតមកដល់បច្ចុប្បន្ន។
គាត់ប្រាប់ថា៖ “ខ្ញុំនៅចុំថា សក់របស់ខ្ញុំខ្មៅ ក្រាស់ និងមាំមួនណាស់។ ជារៀងរាល់ថ្ងៃ ខ្ញុំតែងសិតវាយ៉ាងយកចិត្តទុកដាក់ និងធ្វើឱ្យវារលោង។ ប៉ុន្តែ នៅពេលបានឮសំឡេងហៅពីវិញ្ញាណ ខ្ញុំដឹងភ្លាមថា ខ្ញុំគឺជាមនុស្សដែលត្រូវបានជ្រើសរើស”។
លោកតាបន្តថា៖ “ខ្ញុំបានប៉ះទៅលើសក់ ហើយក្នុងរយៈពេលតែមួយយប់ វាក៏បានក្លាយទៅជារឹងបែបនេះ។ ពេលនេះ វាដូចទៅនឹងរាងកាយដោយឡែកយ៉ាងដូច្នោះដែរ”។
កូនប្រុសទី4របស់លោកតា Chien ដែលមានឈ្មោះថា Luom អាយុ62ឆ្នាំ គឺជាអ្នកជួយថែរក្សាសក់ប្រវែង5ម៉ែត្ររបស់គាត់។ ដោយសារទទួលឥទ្ធិពលពីឪពុក លោក Luon ក៏មានជំនឿទៅលើព្រលឹងវិញ្ញាណនានាដែលតភ្ជាប់សក់ជាមួយនឹងការស្លាប់។ លោក Luom បានរៀបរាប់ថា លោកធ្លាប់បានឃើញមនុស្សម្នាក់បានស្លាប់នៅនឹងមុខ ក្រោយពីព្យាយាមយកខ្សែមកចងសក់។
លោក Luom បានលើកសក់មកបង្ហាញ និងនិយាយបន្តថា៖ “ទាំងនេះ មើលទៅដូចសាមញ្ញ ប៉ុន្តែស័ក្ដិសិទ្ធិខ្លាំងណាស់”៕
ប្រភព៖ សារព័ត៌មានបរទេស
