បច្ចុប្បន្ននេះ ទោះបីជាស្ថានភាពនៃការរីករាលដាលជំងឺ Covid-19 មិនទាន់បាត់អស់ទាំងស្រុងលើពិភពលោកក៏ដោយ តែប្រទេសមួយចំនួនហាក់ចាប់ផ្តើមស៊ាំជាមួយនឹងការរស់នៅរបៀបថ្មី។ នៅប្រទេសចិន ដោយសារតែជំងឺ Covid-19 បានជំរុញឱ្យប្រជាជនមានការផ្លាស់ប្តូររបៀបនៃការរស់នៅ ដោយក្នុងនោះការដើរផ្សារ និងទិញផលិតផលរបស់ប្រជាជនចាប់ផ្តើមមានការប្រែប្រួល។
វេទិការសេដ្ឋកិច្ចពិភពលោកបានលើកឡើងថា មានរឿងសំខាន់3 ចំណុចដែលប្រជាជនចិនមានការផ្លាស់ប្តូរ។ ចំណុចទី1 គឺមនុស្សមានអារម្មណ៍ថាធូរស្បើយក្នុងការនៅផ្ទះ ហើយមិនប្រើក្រែម និងផលិតផលតុបតែងមុខច្រើន។ បន្ថែមពីលើនេះ មនុស្សម្នាក់ៗចាប់ផ្តើមស្វែងរកវិធីសាស្ត្រល្អៗដើម្បីធ្វើនៅផ្ទះ កាត់បន្ថយភាពតានតឹង និងធ្វើឱ្យជីវិតកាន់តែមានន័យ។ ស្ថាប័នខាងលើបានលើកឡើងផងដែរថា ក្នុងកាលៈទេសៈនេះ តម្រូវការសៀវភៅ និងម៉ាស៊ីនហាត់ប្រាណចាប់ផ្តើមមានការកើនឡើងខ្លាំង។ បន្ថែមពីលើនេះ អ្វីដែលគួរឱ្យកត់សម្គាល់គឺ ដោយសារតែការពាក់ម៉ាសបានក្លាយជារឿងសាមញ្ញសម្រាប់ប្រជាជនចិន ធ្វើឱ្យការលក់ផលិតផលក្រែមធ្លាក់ចុះ តែកើនឡើងលើផលិតផលសម្រាប់តុបតែងភ្នែក។
ចំណុចសំខាន់ទី2 គឺអ្នកទិញទំនិញក្មេងៗក្លាយជាអ្នកទិញម្ហូប និងទិញឥវ៉ាន់សម្រាប់គ្រួសារទាំងមូល ជំនួសឱ្យស្ត្រីមេផ្ទះ។ តាមការស្រាវជ្រាវបញ្ជាក់ថា អតិថិជនរហូត70% ដែលដើរផ្សារកើតក្រោយឆ្នាំ 1995។
ចំនុចទី3 គឺការលក់តាមអនឡាញមានការកើនឡើងខ្លាំង ដោយក្នុងនោះយុវវ័យសម័យថ្មីភាគច្រើនអាចមានសមត្ថភាពផលិតវីដេអូ ឬផ្សព្វផ្សាយផលិតផលបានកាន់តែច្រើនដើម្បីទាក់ទាញអតិថិជន៕
