នៅយប់ថ្ងៃទី 8 ខែមករា ឆ្នាំ 2019 នេះ ម្ចាស់មកុដបវរកញ្ញាភពផែនដីអន្ដរជាតិ កញ្ញា Monique Best ពីប្រទេសអាហ្វ្រិកខាងត្បូង បានអញ្ជើញមកទស្សនកិច្ចប្រទេសកម្ពុជា ជាលើកទី២ ដោយឃើញមានវត្តមាន អ្នកគ្រូ ស កេសរ៉ា ជាអតីតតារាសម្ដែងមានឈ្មោះបោះសំឡេង និងអ្នកសាព័ត៌មានក្នុងស្រុកជាច្រើនរង់ចាំទទួលយ៉ាងកក់ក្ដៅ។
ជួបសម្ភាសន៍ជាមួយអ្នកសាព័ត៌មាន បវរកញ្ញាភពផែនដីអន្ដរជាតិចំណាត់ថ្នាក់លេខ១រូបនេះ បានសម្ដែងអារម្មណ៍រំភើបរីករាយជាក្រៃលែង ខណៈបានធ្វើដំណើរមកដល់កម្ពុជា និងទន្ទេញពេញមាត់ថា ស្រឡាញ់ប្រទេសកម្ពុជា និងប្រជាជនកម្ពុជា ព្រោះកញ្ញាថា ជនជាតិខ្មែរពូកែញញឹម និងរួសរាយរាក់ទាក់។ ដំណើរលើកទី២នេះ មានរយៈពេល ៤ សប្ដាហ៍ក្នុងការបំពេញកិច្ចការងារជាអ្នករៀបចំកម្មវិធីប្រលងបវរកញ្ញាភពផែនដីអន្ដរជាតិរដូវកាលទី២ ក្នុងប្រទេសកម្ពុជាជាម្ចាស់ផ្ទះ និងប្រព្រឹត្តិទៅនៅក្នុងអំឡុងខែ មេសា ឆ្នាំ 2020 ខាងមុខនេះ។
កញ្ញាបានបន្ដថា បេសកម្មមកកម្ពុជានៅលើកនេះ គឺមានឱកាសជាច្រើន ក្នុងការផ្សព្វផ្សាយអំពី បរិស្ថាន ទេសចរណ៍តំបន់ប្រវត្តិសាស្ត្រ និងការបង្ហាញក្ដីស្រឡាញ់ទៅកាន់កុមារកម្ពុជា ជាទីស្រឡាញ់។ យ៉ាងណាមិញ ពីអ្នករៀបចំកម្មវិធីបវរកញ្ញាភពផែនដី ក៏បានអះអាងថា ការប្រកួតបវរកញ្ញាភពផែនដីអន្ដរជាតិឆ្នាំ 2020នេះ គ្រោងធ្វើឡើងយ៉ាងអធឹកអធ័មនៅក្នុងសាលមហោស្រពកោះពេជ្រដដែរ និងមានសន្និសីទសាព័ត៌មានបង្ហាញឱ្យមហាជនអ្នកគាំទ្របានចូលរួមផងដែរ៕
