អ្នកគ្រូ សរ កេសារ៉ា ត្រូវបានមហាជនជាច្រើនស្គាល់ថា ជាគ្រូបង្វឹកផ្នែកសិល្បៈ និងជាផលិករភាពយន្ដមួយដែលមានឈ្មោះបោះសំឡេងផងដែរ។ នៅថ្ងៃបើកមហោស្រពភាពយន្ដជាតិលើកទី៦ ឆ្នាំ ២០១៩ នេះ អ្នកគ្រូបាននាំភាពយន្ដ « រ៉ូហ្សា៥ » ដែលសម្ដែងពីតថភាពជីវិតខុសគ្នារបស់អាមេរិក និងខ្មែរ មកដាក់បង្ហាញឱ្យមហាជនបានទស្សនា និងជួយគាំទ្រ។ ក្នុងនោះអ្នកគ្រូ កេសារ៉ា ក៏បានបង្ហាញជំហរថ្មីមួយក្នុងវិស័យភាពយន្ដខ្មែរ ដែលជាគន្លិះល្អក្នុងការផលិតភាពយន្ដឱ្យទាក់ចិត្តទស្សនិកជន។
អ្នកស្រី សរ កេសារ៉ា ប្រាប់ថា ភាពយន្តដែលអ្នកស្រីចូលរួមប្រកួតបើខ្វះស្ដង់ដារ និងមិនមានសាច់រឿងទទួលយកបាន ក៏នឹងមិនត្រូវបានជាប់ក្នុងចំណោម១៨រឿងមកកាន់មហោស្រពភាពយន្តនេះផងដែរ។ ពាក់ព័ន្ធនឹងការចូលរួមប្រកួត អ្នកស្រីថាមិនមែនដើម្បីចង់បានពានរង្វាន់ ឬ រំពឹងឈ្នះតំណែងជាភាពយន្តឆ្នើមនោះទេ ដោយសារតែអ្នកស្រីយល់ថាស្ដង់ដាក្នុងការផលិតរឿង«រ៉ូហ្សា៥»អ្នកស្រីនៅទទួលស្គាល់ថា មិនទាន់មានស្ដង់ដារគ្រប់គ្រាន់នៅឡើយ។ អ្នកស្រីថា ការចូលរួមនេះ គ្រាន់តែចង់ឱ្យមហោស្រពភាពយន្តជាតិ មានភាពយន្តចម្រុះប្រភេទ និងកាន់តែមានច្រើនរឿងចូលរួមប៉ុណ្ណោះ។
អ្នកស្រី សរ កេសារ៉ា បញ្ជាក់ថា បើទោះជាមួយរយៈមុនអ្នកស្រីមិនចេញផលិតភាពយន្ត តែមិនមែនមានន័យថា អ្នកស្រីបោះបង់នោះទេ ពោលគឺដោយសារតែអ្នកស្រីរវល់ និងមិនទាន់រកឃើញសាច់ដែលស័ក្តសមប៉ុណ្ណោះ។ ភាពយន្តថ្មីនេះ គឺអ្នកស្រីនឹងដាក់ឈ្មោះថា«ផ្កាអង្គារ៍បុស្ស» ដែលដកស្រង់ពីជីតពិតៗយកមកបង្ហាញ ដោយអ្នកស្រីរំពឹង
ថានឹងជោគជ័យ។ អ្នកស្រីប្រកាសថា ភាពយន្តរឿង«ផ្កាអង្គាបុស្ស» ក្រៅពីដាក់បញ្ចាំងក្នុងស្រុក ក៏នឹងយកទៅកាន់មហោស្រពភាពយន្តអន្តរជាតិនៅអាមេរិក និងប្រទេសផ្សេងៗផងដែរ។ អ្នកស្រីទទូចឱ្យមានការគាំទ្រភាពយន្តខ្មែរ និង ថាមិមដកថយជំហរឈប់ផលិតភាពយន្តនោះទេ បើទោះជាការផលិតភាពយន្តនាពេលបច្ចុប្បន្នគឺពិបាកចំណេញ៕
