សម័យបច្ចេកវិទ្យាកាន់តែទំនើប គ្រប់ប្រព័ន្ធទាំងអស់សុទ្ធតែផ្លាស់ប្តូរ មិនថាវិស័យឯកជន រដ្ឋបាលសាធារណៈ ឬប្រព័ន្ធយុត្តិធម៌នោះទេ។
ឯកឧត្តម ជិន ម៉ាលីន អ្នកនាំពាក្យក្រសួងយុត្តិធម៌បានលើកឡើងថា នៅតាមតុលាការទាំងអស់នៅកម្ពុជា អាចនឹងបើកអង្គសវនាការលើសំណុំរឿងនីមួយៗតាមរយៈអនឡាញ។ ការធ្វើបែបនេះគឺដើម្បីឱ្យមានតម្លាភាព និងគុណភាពលើសំណុំរឿងនីមួយៗ។ ក្រសួងយុត្តិធម៌បានកំណត់ឱ្យមានការបង្ហាញព័ត៌មានផ្សេងៗតាមតុលាការជាសាធារណៈ ដែលក្នុងនោះរួមមានទាំងតម្លៃសេវានីមួយៗ កម្មវិធីសវនាការ បានបិទប្រកាសជាសាធារណៈ និងប្រកាសតាមគេហទំព័ររបស់តុលាការដើម្បីឱ្យប្រជាជនមានភាពងាយស្រួល។
ឯកឧត្តម ជិន ម៉ាលីន បាននិយាយថា៖ «គុណភាពតុលាការផ្នែកសេវា ក៏មានការកែទម្រង់ដោយធ្វើទំនើបកម្មផ្នែករដ្ឋបាលតុលាការ ដោយការចុះបញ្ជីសំណុំរឿង និងការគ្រប់គ្រងសំណុំរឿង គឺប្រើប្រាស់បច្ចេកវិទ្យាទាំងអស់»។
ឯកឧត្តមបន្ថែមទៀតថា បន្តិចទៀតនេះ ក្រសួងយុត្តិធម៌មានទិសដៅរៀបចំឱ្យបើកសសវនាការតាមប្រព័ន្ធអេឡិចត្រូនិក គឺភាគីពាក់ព័ន្ធមិនចាំបាច់ចូលខ្លួនក្នុងបន្ទប់សវនាការនោះទេ គឺបើកអនឡាញ ដោយចៅក្រមនៅបន្ទប់មួយ សាក្សី មេធាវី នៅកន្លែងផ្សេងគ្នា ហើយធ្វើតាម Conference ដើម្បីជួបគ្នា៕
