អ្នកចាំទី KepaArrizabalaga របស់ក្រុម Chelsea បានបញ្ជាក់ថា លោកមានការគោរពទាំងស្រុងចំពោះអ្នកចាត់ការទូទៅលោក Maurizio Sarri ក្រោយពីបានបដិសេធក្នុងការប្តូរចេញ នៅជិតបញ្ចប់ការប្រកួត ក្នុងពេលក្រុមរបស់គេចាញ់ក្រុម Manchester City ក្នុងការប្រកួតពាន League Cup វគ្គផ្តាច់ព្រ័ត្រ ដោយការស៊ុតបាល់ប៉េណាល់ទីក្នុងលទ្ធផល 4-3។
លោក Sarri បានផ្ទុះកំហឹងយ៉ាងខ្លាំង នៅពេលដែល Kepa បានបដិសេធក្នុងការចាកចេញពីទីលាន ក្រោយពីទទួលការព្យាបាលនៅលើទីលាន ប៉ុន្តែក្រោយមក គ្រូបង្វឹកសញ្ជាតិអ៊ីតាលីរូបនេះ បានបញ្ជាក់ថា កំហឹងរបស់លោកបានកើតឡើងដោយសារតែការភាន់ច្រឡំ។
Kepa បានសរសេរនៅលើបណ្តាញសង្គម Twitter ថា៖ «ខ្ញុំគ្មានបំណងក្នុងការមិនស្តាប់បង្គាប់របស់គ្រូបង្វឹក ឬក៏ការសម្រេចចិត្តរបស់លោកឡើយ។ ខ្ញុំគិតថា អ្វីៗបានកើតឡើងដោយសារតែការភាន់ច្រឡំប៉ុណ្ណោះ ដោយសារតែភាពតានតឹងនៅការប្រកួតដណ្តើមពាន»។
លោក Sarri បានព្យាយាមដាក់អ្នកចាំទី Willy Caballero ជំនួសអ្នកចាំទីមានតម្លៃខ្លួនខ្ពស់បំផុតរបស់ពិភពលោក Kepa ក្នុងពេលជិតបញ្ចប់ការប្រកួតរយៈពេល 120នាទី ដែលបានបញ្ចប់ក្នុងលទ្ធផលស្មើ ០-០។ Kepa បានព្យាយាមទទួលការព្យាបាលសម្រាប់បញ្ហារបួស នៅជិតបញ្ចប់ការប្រកួត ហើយលោក Sarriបាននិយាយថា លោកជឿជាក់ថា រូបគេមានបញ្ហារមួលក្រពើ នៅមុនពេលគ្រូពេទ្យប្រចាំក្លិបបានបញ្ជាក់ពីបញ្ហាផ្សេងបន្ទាប់ពីនោះ។
លោក Sarri បានឱ្យដឹងថា៖ «វាជាការយល់ច្រឡំដ៏ធំមួយ ពីព្រោះខ្ញុំបានយល់ឃើញថា រូបគេមានបញ្ហារមួលក្រពើ ហេតុនេះ ខ្ញុំមិនចង់ឱ្យរូបគេបន្តលេងរហូតដល់ការស៊ុតបាល់ប៉េណាល់ទីកាត់សេចក្តីក្នុងលក្ខខណ្ឌបែបនោះឡើយ»។
គ្រូបង្វឹករូបនេះបានបន្ថែមទៀតថា៖ «ខ្ញុំបានដឹងពីស្ថានភាពនេះ ក្រោយពីរយៈពេល ៣ ឬ៤នាទី នៅពេលដែលគ្រូពេទ្យបានដើរមកកាន់កន្លែងកៅអីអង្គុយវិញ»៕
ប្រភពពី៖ Sport24
