ដោយសារកំណើនពាណិជ្ជកម្ម និងភ្ញៀវទេសចរ អាកាសយានដ្ឋានអន្តរជាតិនៃខេត្តព្រះសីហនុត្រូវបានគេមើលឃើញថា មានការកើនឡើងយ៉ាងខ្លាំងនូវចំនួនអ្នកដំណើរក្នុងរយៈពេល11ខែនៃឆ្នាំ2018នេះ។
ចាប់ពីខែមករា ដល់ខែវិច្ឆិកា អាកាសយានដ្ឋានអន្តរជាតិខេត្តព្រះសីហនុបានទទួលការដឹកជញ្ជូនតាមជើងហោះហើរចំនួន 3,619ជើងជាមួយនឹងការកើនឡើងនៃចំនួនអ្នកដំណើរ 89% ស្មើនឹង 274,535នាក់។ ពោលគឺជាមួយនឹងក្រុមហ៊ុនអាកាសចរណ៍ថ្មីចំនួន3 ដែលចាប់ផ្តើមប្រតិបត្តិការជើងហោះហើរនៅព្រលានយន្តហោះអន្តរជាតិខេត្តព្រះសីហនុនៅឆ្នាំនេះ បានធ្វើឱ្យចំនួនអ្នកដំណើរសរុបនៅអាកាសយានដ្ឋានមួយនេះកើនឡើងប្រមាណដល់ទៅ11ដង។ នេះបើតាមការឱ្យដឹងពីលោកប្រធានមន្ទីរទេសចរណ៍ខេត្តព្រះសីហនុ។
លោក តាំង សុចិត្រគ្រឹស្នា ប្រធានមន្ទីទេសចរណ៍ខេត្តព្រះសីហនុបានមានប្រសាសន៍ថា៖ “ក្នុងចំណោមក្រុមហ៊ុនថ្មីទាំង3នេះ មាន2គឺជាក្រុមហ៊ុនក្នុងស្រុក និងមួយទៀតជាក្រុមហ៊ុនបរទេស”។ បច្ចុប្បន្នយើងមានក្រុមហ៊ុនអាកាសចរណ៍ក្នុងស្រុក 6 និងក្រុមហ៊ុនបរទេស 5 ដែលធ្វើការហោះហើរត្រង់ពីប្រទេសវៀតណាម ម៉ាឡេស៊ី និង15ខេត្តក្នុងប្រទេសចិន។
លោកបានបញ្ជាក់បន្ថែមថា ព្រលានយន្តហោះបច្ចុប្បន្នគ្រប់គ្រងជើងហោះហើរចំនួនជាង 100ជើងក្នុងមួយសប្តាហ៍ដោយមានចំនួនអ្នកទេសចរអន្តរជាតិ និងអ្នកធ្វើដំណើរឆ្លងកាត់ព្រលានយន្តហោះបានកើនឡើង90% (ប្រមាណ 272,155នាក់)ស្របពេលដែលចំនួនអ្នកដំណើរកម្ពុជាកើនឡើង47%។
លោក សុចិត្រគ្រឹស្នា បានបន្ថែមថា៖ “កំណើននៃឧស្សាហកម្មអាកាសចរណ៍ត្រូវបានកើតឡើងដោយសារតែកំណើនសេដ្ឋកិច្ចដ៏រឹងមាំ និងស្ថិរភាពនយោបាយ”។ លោកបានឱ្យដឹងទៀតថា ក្រុមហ៊ុនអាកាសចរណ៍បាងកកអ៊ែរវេយ៍ ក៏បានប្រកាសពីផែនការបង្កើតជើងហោះហើរទៅកាន់ខេត្តព្រះសីហនុនៅឆ្នាំបន្ទាប់នេះដែរ។
លោកបានបញ្ជាក់ទៀតថា ក្រុមហ៊ុនអាកាសចរណ៍មួយចំនួនទៀត ក៏បានចាប់អារម្មណ៍ក្នុងការហោះហើរមកកាន់ខេត្តឆ្នេរសមុទ្រនេះផងដែរ ដែលប្រការនេះបានជំរុញឱ្យអាជ្ញាធរព្រលានយន្តហោះត្រូវជួសជុលគ្រឿងបរិក្ខារនៃព្រលានដើម្បីទទួលជើងហោះហើរបន្ថែមទាំងអស់នោះ។
ឯកឧត្តម ស៊ិន ចាន់សិរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិលបានប្រាប់ឡារ៉ែនពាណិជ្ជតាមទូរស័ព្ទថា៖ “តាមតួលេខដែលខាងមន្ទីរទេសចរណ៍ខេត្តព្រះសីហនុមាន មិនជាខុសគ្នាទេ ព្រោះបើយោងតាមរបាយការណ៍ជើងហោះហើរបានបង្ហាញថា បើគិតត្រឹមតែខែវិច្ឆិកា ឆ្នាំ2018 ជើងហោះហើរដែលខេត្តព្រះសីហនុទទួលបានគឺ 311ជើងហោះហើរអន្តរជាតិ និង207ជើងហោះហើរក្នុងស្រុក។ បើគិតជាសរុបជើងហោះហើរអន្តរជាតិនិងក្នុងស្រុកមានចំនួន518”។ ឯកឧត្តមបានបញ្ជាក់បន្ថែមថា៖ “បើគិតក្នុងរយៈពេល 11ខែនៃឆ្នាំ2018នេះ ចាប់ពីខែមករា ដល់ខែវិច្ឆិកា អាកាសយានដ្ឋានអន្តរជាតិខេត្តព្រះសីហនុទទួលបានការដឹកជញ្ជូនតាមអាកាសចំនួន 4,232ជើងហោះហើរ”។
សូមបញ្ជាក់ថា ព្រលានយន្តហោះអន្តរជាតិកងកេងនៃខេត្តព្រះសីហនុបានបញ្ចប់គម្រោងកែលម្អព្រលានកាលពីខែមិថុនា រួមទាំងការពង្រីកព្រលានយន្តហោះរហូតដល់ទៅ 80%នៃទំហំដើមរបស់ខ្លួនដែលជា“ការជួសជុលឡើងវិញ”នៅតាមកន្លែងនានា (ជាពិសេសតំបន់ត្រួតពិនិត្យ កន្លែងរង់ចាំ និងកន្លែងទទួលឥវ៉ាន់) និងការបំពាក់ឧបករណ៍ថ្មីៗ រួមទាំងប្រព័ន្ធគ្រប់គ្រងឥវ៉ាន់ទៀតផង។
ការជួសជុលស្ថានីយព្រលានយន្តហោះអន្តរជាតិនេះគឺជាលទ្ធផលនៃការកើនឡើងនូវប្រជាប្រិយភាពនៃខេត្តព្រះសីហនុក្នុងគោលដៅទេសចរណ៍។ ដោយគោលនយោបាយរបស់រាជរដ្ឋាភិបាលគឺទាក់ទាញភ្ញៀវទេសចរឱ្យកាន់តែច្រើន ក៏ដូចជាការវិនិយោគនៅក្នុងខេត្ត ដែលក្នុងន័យនេះការជួសជុលព្រលានយន្តហោះ គឺជាគន្លឹះក្នុងការផ្តល់សេវាបដិសណ្ឋារកិច្ចល្អប្រសើរ និងកាន់តែងាយស្រួល ព្រោះព្រលានយន្តហោះនៅក្នុងខេត្តនេះមានទំនាក់ទំនងផ្លូវអាកាសដ៏អស្ចារ្យជាមួយបណ្តាប្រទេសនៅក្នុងតំបន់ជាពិសេសប្រទេសចិន ម៉ាឡេស៊ី វៀតណាម និងប្រទេសថៃ។
យោងតាមគម្រោងជួសជុលរបស់ក្រុមហ៊ុនអាកាសយានដ្ឋានកម្ពុជា សម្រាប់ព្រលានយន្តហោះនៅក្រុងព្រះសីហនុនេះ មានការបន្ថែមផ្លូវរត់ពី 800ម៉ែត្រ ទៅដល់3.3គីឡូម៉ែត្រ។ នៅពេលបញ្ចប់គម្រោងជួសជុល អាកាសយានដ្ឋានមួយនេះនឹងអាចផ្ទុកយន្តហោះដឹកអ្នកដំណើរ និងយន្តហោះដឹកជញ្ជូនទំនិញធំៗជាប្រចាំពីទីផ្សារធំៗជាពិសេសពីតំបន់ផ្សេងៗនៅអាស៊ី។
សូមជម្រាបដែរថា នៅឆ្នាំ2017 ចំនួនអ្នកដំណើរឆ្លងកាត់អាកាសយានដ្ឋានអន្តរជាតិរបស់កម្ពុជាមានចំនួន 8.8 លាននាក់។ អាកាសយានដ្ឋានអន្តរជាតិភ្នំពេញ និងសៀមរាបទទួលបានអ្នកដំណើរ 4.2លាននាក់ ខណៈព្រលានយន្តហោះអន្តរជាតិខេត្តព្រះសីហនុទទួលបាន338,000នាក់៕
