ខ្សែបម្រើអន្តរជាតិហូឡង់ Kevin Strootman ពីក្លិប Roma បានចូលរួមជាមួយនឹងក្លិប Marseille ក្នុងតម្លៃខ្លួន 25លានអឺរ៉ូ (ស្មើនឹង 29លានដុល្លារអាមេរិក)។
កីឡាករវ័យ 28ឆ្នាំរូបនេះបានលេងក្នុងការប្រកួត 44លើក កាលពីរដូវកាលមុន ខណៈដែលក្រុម Roma បានបញ្ចប់ក្នុងចំណាត់ថ្នាក់លេខ3 នៅលើតារាងក្របខ័ណ្ឌ Serie A និងបានឈានទៅវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League។ ក្លិប Marseille បានប្រកាសពីការចុះហត្ថលេខានេះតាមរយៈការបង្ហោះវីដេអូផងដែរ។ ក្លិប Roma បានឱ្យដឹងថា៖ «ក្លិបនេះ សូមថ្លែងអំណរគុណដល់ Kevin សម្រាប់សេវាកម្មរបស់គេក្នុងរយៈពេលជាច្រើនឆ្នាំមកនេះ និងសូមជូនពរឱ្យរូបគេជួបតែសំណាងល្អទៅថ្ងៃអនាគត»។ Strootman បានលេងក្រោមការដឹកនាំរបស់លោក Rudi Garcia ដែលជាគ្រូបង្វឹករបស់ Marseille នាពេលបច្ចុប្បន្ន នៅពេលដែលរូបគេបានចូលរួមជាមួយនឹងក្លិប Roma ពីក្លិប PSV Eindhoven កាលពីឆ្នាំ2013។ រូបគេគឺជាកីឡាករឆ្នើមទី3 ក្នុងការចាកចេញពី Roma នៅរដូវក្តៅនេះ ក្រោយពីអ្នកចាំទីអន្តរជាតិប្រេស៊ីល Alisson បានចូលរួមជាមួយនឹងក្លិប Liverpool ហើយខ្សែបម្រើ RadjaNainggolan បានចូលរួមជាមួយនឹងក្លិប Inter Milan។
រូបគេបានបង្ហាញខ្លួនជាអន្តរជាតិចំនួន 41លើកសម្រាប់ក្រុមជម្រើសជាតិហូឡង់ បើទោះបីបញ្ហារបួស 2លើកបានរំខានដល់ពេលវេលារបស់គេនៅឯក្លិប Roma និងបានធ្វើឱ្យរូបគេអវត្តមានក្នុងព្រឹត្តិការណ៍ World Cup ឆ្នាំ2014 ក៏ដោយ។ ការចុះហត្ថលេខាជាមួយនឹង Strootman នឹងជួយឱ្យក្លិប Marseille បំពេញកន្លែងទំនេរដែលត្រូវបានចាកចេញដោយខ្សែបម្រើអន្តរជាតិកាមេរូន Andre-Frank ZamboAnguissa ដែលត្រូវបានលក់ទៅឱ្យក្លិប Fulham កាលពីដើមខែនេះ សម្រាប់តម្លៃខ្លួន 30លានអឺរ៉ូ៕
ប្រភពពី៖ BBC
