កំពូលតារាចម្រៀងចាស់វស្សាអ្នកនាង ម៉េង កែវពេជ្ជតា បានចាកចេញទៅច្រៀង និងសម្តែងនៅប្រទេសបារាំងរយៈពេលដល់ទៅ3ខែ តបតាមការអញ្ជើញរបស់សមាគមតារាខ្មែរប្រចាំនៅទីនោះ។ ការចេញទៅរកប្រាក់ចំណូលនៅក្រៅប្រទេសរបស់អ្នកនាង ម៉េង កែវពេជ្ជតា នៅពេលនេះ គឺមានការរួមដំណើរពីសំណាក់តារាចម្រៀងប្រុសម្នាក់ទៀតផងដែរ ប៉ុន្តែអ្នកនាងសុំមិនបញ្ចេញឈ្មោះ ព្រោះជាសិទ្ធិរបស់បុគ្គល។ ជាមួយនឹងការចេញទៅបង្ហាញមុខនៅលើទឹកដីត្រជាក់ធ្លាក់ទឹកកកខាងលើនេះ អ្នកនាង ម៉េង កែវពេជ្ជតា ក៏បានបង្ហើបផងដែរថា បើមានសំណាងពិតមែន ទំនងអាចជួបស្នេហ៍ថ្មីនៅលើទឹកដីប្រទេសបារាំងក៏មិនដឹង។
មុនពេលបោះជំហានឈានជើងចូលក្នុងស្ថានីយចេញដំណើរហោះឆ្ពោះទៅកាន់ប្រទេសបារាំងកាលពីពេលកន្លងទៅ អ្នកនាង ម៉េង កែវពេជ្ជតា ដែលតារាចម្រៀងស្រីល្បីឈ្មោះជាង20ឆ្នាំរូបនេះ បានឱ្យដឹងថា អ្នកនាងបានចោលកម្មវិធីមួយចំនួននៅក្នុងស្រុកខ្មែរ ដើម្បីចេញទៅសម្តែងច្រៀងនៅប្រទេសបារាំង ប៉ុន្តែវាមិនមែនជាបញ្ហានោះទេ ព្រោះអ្វីៗបានរៀបចំអស់ទៅហើយ។ ម៉េង កែវពេជ្ជតា បញ្ជាក់ថា “ខ្ញុំទៅច្រៀងនៅបារាំង3ខែចប់ នឹងបន្តដំណើរទៅច្រៀងដល់ប្រទេសស្វីសផងដែរ ជាមួយតារាចម្រៀងប្រុសម្នាក់ទៀត។ ការចេញទៅច្រៀងនៅក្រៅប្រទេសនេះ ធ្វើឱ្យខ្ញុំចោលកម្មវិធីមួយចំនួននៅក្នុងស្រុកដែរ តែមិនអីទេ ខ្ញុំបានដោះស្រាយអស់ហើយអ៊ីចឹងខ្ញុំត្រូវតែចេញទៅតាមការកំណត់”។
យ៉ាងណាក៏ដោយចំពោះព្រឹត្តិការណ៍នៃចាកចេញទៅក្រៅប្រទេសរបស់ ម៉េង កែវពេជ្ជតា នាពេលនេះ វាមិនមែនជារឿងថ្មី និងចម្លែកនោះទេ ប៉ុន្តែអ្វីដែលជារឿងគួរឱ្យចាប់អារម្មណ៍នោះត្រង់ថា ស្របពេលដែលអ្នកនាងចាកចេញទៅ ក៏ធ្លាយព័ត៌មានមកថា ពេលនេះនាងកំពុងតែមានទំនាក់ទំនងស្នេហាជាមួយបុរសអាណិកជនខ្មែរ វ័យចំណាស់ម្នាក់នៅប្រទេសបារាំង។ ដូចនេះ ការចេញទៅច្រៀងនៅប្រទេសបារាំងសាជាថ្មីរបស់កំពូលតារាចម្រៀងរូបនេះ អាចជារឿងល្អដែលនឹងឈានទៅបញ្ចប់ឈ្មោះថាជាអ្នកមេម៉ាយនោះទៀតហើយ។ ម្យ៉ាងវិញទៀត កាលពីពេលកន្លងទៅថ្មីៗនេះ គេក៏ធ្លាប់បានឃើញកំពូលតារាចម្រៀងរូបនេះបង្ហោះសារនៅលើគណនីផ្ទាល់ខ្លួនផងដែរ ដោយបង្ហាញពីក្ដីស្រមៃ និងរំពឹងចង់គ្រងឈុតសម្លៀកបំពាក់ជាកូនក្រមុំសាជាថ្មីផងដែរ៕
