ក្រុមបិសាចក្រហម Manchester United របស់លោក Jose Mourinho នឹងសម្លឹងរកការឈ្នះកៅអីទៅប្រកួតវគ្គ16ក្រុមចុងក្រោយនៃក្របខ័ណ្ឌ Champions League នៅពេលដែលពួកគេធ្វើជាម្ចាស់ផ្ទះទទួលក្រុមបាតតារាង Benifica ក្នុងការប្រកួតពូល A នៅរាត្រីនេះ។
ក្រុមរបស់លោក Mourinho អាចនឹងឈ្នះកៅអីទៅលេងក្នុងវគ្គ16ក្រុម ដោយការនៅសល់2ប្រកួតទៀត តាមរយៈការយកឈ្នះនៅកីឡដ្ឋាន Old Trafford ប្រសិនបើ Basel គេចផុតពីបរាជ័យពេលប៉ះក្រុម CSKA Moscow។ Man Utd មិនស្គាល់ចាញ់សោះលើទឹកដីខ្លួនឯង ពីការជួបប្រកួតជាមួយនឹងក្រុមមកពីព័រទុយហ្គាល់ចំនួន12លើក ខណៈដែលការចាញ់ជាលើកចុងក្រោយរបស់ពួកគេលើទឹកដីខ្លួនឯងក្នុងក្របខ័ណ្ឌអឺរ៉ុប បានកើតឡើងក្នុងលទ្ធផល 2-1 ពេលជួបក្រុម Real Madrid កាលពីរដូវកាលឆ្នាំ2012-2013។
Benfica ហាក់កំពុងតែឆ្ពោះទៅកាន់ការធ្លាក់ចេញ ក្រោយពីចាញ់3លើកពីការប្រកួតបើកឆាកទាំង3លើករបស់ពួកគេ ហើយនិងលេងដោយគ្មានខ្សែការពារជើងចាស់ Luisao ក្រោយពីការរងពិន័យកាតក្រហម ក្នុងពេលក្រុមខ្លួនចាញ់ Man United 1-0 ក្នុងក្រុង Lisbon កាលពី2 សប្តាហ៍មុន។ ខ្សែប្រយុទ្ធសញ្ជាតិប្រេស៊ីល Jonas បានរកគ្រាប់បាល់បញ្ចូលទីក្នុងការប្រកួតលីកលើកទី12របស់គេ ក្នុងពេលក្រុមខ្លួនទទួលជ័យជម្នះ 1-0 លើក្រុម Feirense កាលពីថ្ងៃសុក្រ ខណៈដែលក្រុម Man United បានស្តារមុខមាត់ពីការរងបរាជ័យក្រោមស្នាដៃក្រុម Huddersfield Town តាមរយៈការផ្តួលក្រុម Tottenham 1-0 កាលពីថ្ងៃសៅរ៍ តាមរយៈគ្រាប់បាល់ឈ្នះរបស់ Anthony Martial។ ស្របពេលជាមួយគ្នានេះ Sporting Lisbon និង Juventus នឹងត្រូវប្រជែងយកចំណាត់ថ្នាក់លេខ2ក្នុងពូល D បន្ទាប់ពី Barcelona ខណៈការប្រកួតនៅរាត្រីនេះ គឺជាការប្រកួតដ៏សំខាន់ ក្រោយពីក្រុមយក្សរបស់អ៊ីតាលី បានយកឈ្នះ 2-1 កាលពីជើងមុន ក្នុងទីក្រុង Turin។
ក្រុម Sporting កំពុងតែសម្លឹងរកការតាមស្មើពិន្ទុរបស់គូប្រកួតខ្លួន បើទោះបី Juventus នឹងស្ថិតយ៉ាងប្រកៀកក្នុងការទៅវគ្គបន្ត ប្រសិនបើឈ្នះក៏ដោយ។ Juventus ទើបតែបានកត់ត្រាជ័យជម្នះ6លើកជាប់ៗគ្នានេះ ក្នុងក្របខ័ណ្ឌ Serie A ហើយពួកគេបានកម្តៅសាច់ដុំសម្រាប់ការប្រកួតនេះ តាមរយៈការផ្តួលក្រុម AC Milan 2-០ កាលពីថ្ងៃសៅរ៍កន្លងទៅ។ ការប្រកួតទាំងពីរគូនឹងចាប់ផ្តើមនៅម៉ោង 2:45ទៀបភ្លឺ៕
ប្រភពពី៖ Sport 24