ការចាប់ឆ្នោតសម្រាប់ការប្រកួតពាន Carabao Cup វគ្គ8ក្រុមចុងក្រោយ តម្រូវឲ្យក្រុម Bristol City ត្រូវប៉ះជាមួយនឹងក្រុម Manchester United ក្រោយពីបញ្ហាបច្ចេកទេសបានធ្វើឲ្យអ្នកគាំទ្រត្រូវរង់ចាំជិតរយៈពេល2ម៉ោងទើបអាចមើលឃើញពីការផ្សាយផ្ទាល់នៅលើបណ្តាញសង្គម Twitter។
ស្របពេលជាមួយគ្នានេះ ក្រុម Arsenal នឹងត្រូវជួបក្រុមស្ថិតក្នុងទីក្រុងតែម្តង គឺក្រុម West Ham ខណៈដែលក្រុម Leicester City នឹងធ្វើជាម្ចាស់ផ្ទះទទួលក្រុមខ្លាំង Manchester City ហើយក្រុម Chelsea ត្រូវបើកទ្វារទទួលក្រុម Bournemouth។ ប៉ុន្តែ ទោះបីជាយ៉ាងណា ក្រោយពីការចេញសេចក្តីប្រកាស 4លើកដើម្បីពន្យល់ពីការពន្យារពេលនេះ ទីបំផុតបណ្តាញសង្គម Twitter បានបង្ហាញពីរូបភាពវីដេអូដែលត្រូវបានគេថតទុកជាមុនរួចហើយ។
ទាំងក្របខ័ណ្ឌលីកកីឡាបាល់ទាត់អង់គ្លេសហៅកាត់ថា EFL និងបណ្តាញសង្គម Twitter បានធ្វើការសុំអភ័យទោសសម្រាប់ការពន្យារពេលរយៈពេល1ម៉ោង និង45នាទីនេះ។ EFL បានឲ្យដឹងក្នុងសេចក្តីថ្លែងការណ៍មួយថា៖ «EFL បានទទួលការសុំអភ័យទោសពីសំណាក់ Twitter នៅចក្រភពអង់គ្លេស សម្រាប់ការពន្យារពេលនេះដែលត្រូវបានគេជឿជាក់ថា បានកើតឡើងដោយសារតែកំហុសបច្ចេកទេស។ EFL បានស្នើឲ្យមានការត្រួតពិនិត្យដ៏ពេញលេញមួយទៅលើព្រឹត្តិការណ៍ផ្សេងៗដែលនាំឲ្យមានការពន្យារពេលដែលមិនអាចទទួលយកបានមួយនេះ»។ ការប្រកួតនេះនឹងចាប់ផ្តើមនៅថ្ងៃទី18 ខែធ្នូ ខាងមុខ៕
ការចាប់ឆ្នោតសម្រាប់ពាន League Cup វគ្គ8ក្រុមចុងក្រោយ
Chelsea vs Bournemouth
Arsenal vs West Ham
Leicester vs Manchester City
Bristol City vs Manchester United
ប្រភពពី៖ BBC
